İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 408 Hüküm no: 429 Orijinal metin no: [54a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Ferhad isimli Ermeni’nin tezgâhtarı Sergiz’e açtığı alacak davasanın anlaşmayla sonuçlandığı İkrâr-ı deyn. Mahmiye-i İstanbul’da Sıçanlıhamam kurbünde Ali Ağa fırınında bundan akdem ekmekçi olan Ferhad v. Omercan nâm Ermeni mahfil-i kazâda destgâhdârı olan işbu râf‘u’s-sifr Sergiz v. Safer nâm Ermeni muvâcehesinde ikrâr ve takrîr-i kelâm edip mezbûr Sergiz târih-i kitâbdan bir sene mukaddem zikrolunan fırında destgâhdârım olmağla üç günde bey‘ eylediği ekmek semeninden zimmetinde ba‘de küllî hesâb on bir bin akçe hakkım olup meblağ-ı mezbûru mezkûr Sergiz yedinden hâlâ on bir bin akçeyi bi’t-tamam ve’l-kemâl ahz u kabz eyledim. Meblağ-ı mezkûrdan zimmetinde bir akçe ve bir habbe bâkī kalmadı dedikde gıbbe’t-tasdîk mâ hüve’l-vâki‘ bi’t-taleb ketb olundu. Fi’s-sâlis ve’l-işrîn min-Ramazani’l-mübârek li-sene isneyn ve seb‘în ve elf. Şuhûdü’l-hâl: Abdi Çelebi b. Hüseyin, Baba Rasûl b. Rıdvan, Mehmed Çelebi b. Abdullah, Mehmed b. Ramazan, Hüseyin b. Ebîbekir, Bagdasar v. Arakil, Avanos v. Arzuman, Agop v. Arzuman, Marat v. Arslan.