İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 408 Hüküm no: 430 Orijinal metin no: [54a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muslu Bey’in İshak b. Hüseyin’e olan borcunu ödemesi için tenbih edildiği İki yüz guruş ikrâr teslîme tenbîh. Fi’l-asl vilâyet-i Anadolu’da Avşar kasabasında Bali mahallesinde sâkin olup hâlâ mahmiye-i İstanbul’da Çukurhan’da ticâret üzere sâkin işbu râfi‘u’l-kitâb el-Hâc İshak b. Hüseyin nâm kimesne meclis-i şer‘de Muslu Bey b. Abdi mahzarında üzerine da‘vâ ve takrîr-i kelâm edip mezbûr Muslu Bey’e târih-i kitâbdan dört sene mukaddem riyâlî guruş doksan akçeye râyic iken on sekiz bin akçe olmak üzere iki yüz riyâlî guruş verip meblağ-ı mezbûrdan altı bin akçesini mezbûr Muslu Bey’e karz ve on iki bin akçesini târih-i mezbûrda vefât eden karındaşım Mehmed nâm kimesne bilâ-veled-i zeker vefât etmekle ale’l-iştirâki’s-seviy babamızdan ikimize intikāl eden tarlalarda olan müteveffâ-yı mezbûrun nısf hisse-i şâyi‘ini tapu-yı misli olan on iki bin akçeye sahib-i arzdan benim için tefevvüz eyle deyü ve on iki bin akçeden ziyâdeye tefevvüzden nehy eylemiş iken mezbûr Muslu Bey iznime muhâlefet edip on sekiz bin akçeye tefevvüz eyledim deyü benden bi-tarîkı’l-karz ahz eylediği altı bin akçeyi on iki binden ziyâde bedel-i tefvîz deyü sahib-i arza verdiği altı bin akçeye takās eyledim deyü karz verdiğim altı bin akçeyi bana edâdan imtinâ‘ eder suâl olunup on sekiz bin akçe mukābelesinde def‘ eylediğim iki yüz guruş alıverilmek murâdımdır dedikde gıbbe’s-suâl mezbûr Muslu Bey cevâbında fi’l-vâki‘ kazıyye müdde‘î-yi mezbûrun takrîr eylediği üzere olmuşdur deyü yedinden ahz eylediği iki yüz riyâlî guruşu bi-tav‘ihiikrâr etmeğin alâ-mûceb-i ikrâr müdde‘î-yi mezbûrdan ahz eylediği iki yüz riyâlî guruşu def‘ ve teslîme tenbîh olunup mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min-Ramazani’l-mübârek li-sene isneyn ve seb‘în ve elf. Şuhûdü’l-hâl: Osman Beşe b. Çukadâr, Sarrâc Ali Beşe b. ( ), Abdi Çelebi b. Hüseyin, Osman Çelebi b. Ser-bölük-i muhzırân, Baba Rasûl b. Rıdvan el-muhzır.