İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 409 Hüküm no: 431 Orijinal metin no: [54a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habib Ağa Çayniçe’nin Gorajde kasabasında bulunan bağ ve bağçesini Salih Ağa’ya satması Mübâya‘a. Mahmiye-i İstanbul’da Sekbânbaşı İbrahim Ağa mahallesi sâkinlerinden Habib Ağa b. Muslihüddin Efendi meclis-i şer‘-i hatîr ü lâzımü’t-tevkīrde işbu râfi‘u’l-kitâb Salih Ağa b. Hasan mahzarında ikrâr ve takrîr-i kelâm edip mülk-i mevrûsum olup vilâyet-i Rumeli’nde Hersek sancağında Çayniçe kazâsına tâbi‘ Gorajde nâm kasaba sınırı dâhilinde vâki‘ bir tarafı müşteri-yi mezbûr mülkü ve bir tarafı Demür Yusuf mülkü ve bir tarafı Goreviçe bayırı ve bir tarafı tarîk-i âm ile mahdûd bir kıt‘a mülk bağ ve bahçemi mezbûr Salih Ağa’ya altı bin akçeye tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ol dahi vech[-i muharrer] üzere iştirâ ve kabûl eyledikden sonra semeni olan meblağ-ı mezbûr altı bin akçeyi mezbûr Salih Ağa yedinden bi’t-tamam ve’l-ikmâl ahz u kabz eyledim. Ba‘de’l-yevm hudûd-ı mezkûre ile mahdûd bağ ve bahçe merkūm Salih Ağa’nın mülk-i müşterâsıdır keyfe mâ yeşâ ve yahtâr mutassarıf olmak için mahâllinde zabt ve tasarrufa mezbûr Salih Ağa’yı taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ ve’l-işrîn min-şehri Ramazani’l-mübârek li-sene isneyn ve seb‘în ve elf. Şuhûdü’l-hâl: Mehmed b. Mümin, Osman Çelebi b. Kâtib Ömer Efendi, Mehmed Bey, Ahmed Sipâhî, Yusuf Sipâhî, Mümin Sipâhî, Mehmed Çelebi b. Şaban Efendi, Eyüb Subaşı b. Cafer ve gayruhum.