İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 410 Hüküm no: 432 Orijinal metin no: [54a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Güzelhisar’ın Gedik köyünden olup hizmetkârı Receb’in parasını çaldığı iddiasıyla dava açan İbrahim’in bunu ispat edememesi sonucu davanın kabul edilmediği Yemîn. Vilâyet-i Anadolu’da medîne-i Güzelhisar muzâfâtından Gedik nâm karyede sâkin İbrahim bin ( ) nâm kimesne Dîvân-ı Sadr-ı A‘zamî’de akd olunan meclis-i şer‘de Receb Bey b. Hızır nâm kimesne mahzarında üzerine da‘vâ edip mezbûr Receb ile ben Rüstem Ağa’nın hizmetkârları olmağla mezbûr târih-i kitâbdan on beş gün mukaddem eğer-i heybe içinden iki yüz riyâlî guruşumu hufyeten ahz etmekle mezbûrdan taleb ederim suâl olunsun dedikde gıbbe’s-suâl mezbûr Receb meblağ-ı mezbûru hufyeten ahz eylediğini inkâr eyledikde müdde‘î-yi mezbûr İbrahim Bey’den müdde‘âsı için beyyine taleb olundukda ityân-ı beyyineden izhâr-ı acz edip ber-vech-i âtî istihlâf etmeğin mezbûr Receb Bey müdde‘î-yi mezbûrun eğer-i heybesi içinden iki yüz riyâlî guruşu yevm-i mezbûrda hufyeten ahz eylemediğine ba‘de’t-tahlîf yemîn billâhi te‘âlâ eyledikden sonra müdde‘î-yi mezbûr İbrahim bilâ-beyyine mu‘ârazadan men‘ birle mâ hüve’l-vâki‘ bi’t-taleb ketb olundu. Fi’s-sâbi‘ ve’l-işrîn min-Ramazani’l-mübârek sene 1072. Şuhûdü’l-hâl: Ali Ağa b. Oruc, Kirkitli Mehmed Ağa b. ( ). Mehmed Ağa b. Mahmud ser-muhzırân, Erzanoğlu Mehmed Ağa, Fahrü’l-akrân Ebûbekir Ağa, Fahrü’l-akrân Osman Ağa.