İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 415 Hüküm no: 440 Orijinal metin no: [55a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arapgir’in Pah köyünde bulunan bazı kişilerin İbrahim Bey’in tımarından olmayıp Sultan Mehmed Camii vakfına dahil olduklarının anlaşıldığı Da‘vâ-yı ra‘iyyet. Erbâb-ı tımardan İbrahim Bey b. Abdullah nâm kimesne meclis-i şer‘de mahmiye-i İstanbul’da Balatkapısı dâhilinde vâki‘ Kefeli mahallesinde sâkin Ermeni tâifesinden bâ‘isü’s-sifr Vartan v. Kirakoz ve ve li-ümm karındaşı Avanos v. Aleksan nâm Ermeniler muvâcehesinde üzerlerine da‘vâ ve takrîr-i kelâm edip mezbûrân Vartan ve Avanos hâlâ Arapgir sancağında Pah nâm karye ve gayriden berat-ı şerîfle mutasarrıf olduğum Pah tımarı demekle ma‘rûf tımar defterinde ra‘iyyet oğlu ra‘iyyet kaydolunmuş iken hâlâ üzerlerinde edâsı lâzım gelen çiftbozan ve sâir rüsûmların taleb eylediğimde edâdan imtinâ‘ ederler suâl olunsun dedikde gıbbe’s-suâl mezbûrân Vartan ve Avanos cevâblarında biz merhûm ve mağfûrun-leh Ebulfeth Sultan Mehmed Han Câmi‘-i şerîfi evkāfına bağlı mahmiye-i İstanbul’da İstrati kilisesi <> cemâ‘atinden olup yedimizde olan sûret-i defter-i hâkānî mûcebince her sene üzerimize edâsı lâzım gelen cizye ve sâir rüsûmâtımızı cânib-i vakfdan cem‘ine memûr olanlara edâ ve teslîm edegelmişizdir. Mezbûr İbrahim Bey’in <> tımarı ra‘iyyeti değiliz deyü def‘le mukābele eylediklerinde mezbûr İbrahim Bey’in yedinde olan sûret-i defter-i hâkānîye mürâca‘at olundukda mezbûrânın isimleri mastûr olmadığı müte‘ayyin oldukdan sonra merkūmân Vartan ve Avanos’un yedlerinde olan nişânlı sûret-i defter-i hâkānîye mürâca‘at olundukda fi’l-hakīka takrîrlerinde mutâbık bulunup mezbûrân Vartan v. Kirakoz ve Avanos v. Aleksan defter-i mezkûrda mastûr ve mukayyed bulunmağile mezbûr İbrahim Bey bî-vech mu‘ârazadan men‘ birle bi’t-taleb ketb olundu. Fi’s-sâmin ve’l-işrîn min-şehri Ramazani’l-mübârek li-sene isneyn ve seb‘în ve elf. Şuhûdü’l-hâl: Hasan Çavuş el-mübâşir, Mehmed Ağa b. Mahmud ser-muhzırân, Ali Ağa b. Kethudâ, Hasan Beşe çukadâr, Ali Çelebi b. el-Hâc Mehmed, Yusuf Beşe berber.