İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 416 Hüküm no: 441 Orijinal metin no: [55a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçuk v. Durmuş ile Seyyid İbrahim Çelebi arasında alacak verecek davası Yemîn Mahmiye-i İstanbul’da Sultanhamamı kurbünde destgâhdâr olan Haçuk v. Durmuş nâm habbâz meclis-i şer‘-i hatîrül-lâzımü’t-tevkīrde işbu sahibü’l-kitâb es-Seyyid İbrahim Çelebi b. Ali üzerine da‘vâ ve takrîr-i kelâm edip mezbûr es-Seyyid İbrahim Çelebi’ye târih-i kitâbdan on beş gün mukaddem bi’d-defa‘ât benim için bey‘ ediver deyü def‘ ü teslîm edip ol dahi ahz ve kabûl eylediği dört bin doksan akçe ekmek akçesini taleb eylediğimde bana teslîmden imtinâ‘ eder suâl olunsun dedikde gıbbe’s-suâl mezbûr es-Seyyid İbrahim Çelebi cevâbında târih-i merkūmda müdde‘î-yi merkūmda müdde‘î-yi mezbûr ancak bana bin sekiz yüz seksen akçe verip ben dahi mezbûr Haçuk için on akçede [55b] bir akçe vermek üzere bin sekiz yüz seksen akçe ekmek bey‘ ediverip meblağ-ı mezbûrun on akçede bir akçe cânibinden yüz seksen sekiz akçesi haffâflık olup bâkī bin altı yüz doksan iki akçe deynim vardır deyü bin sekiz yüz seksen akçeyi ikrâr ve iki bin iki yüz on akçe ziyâdeyi inkâr ile cevâb vermeğin müdde‘î-yi mezbûrdan sıdk-ı makālini mübeyyin beyyine taleb olundukda ityân-ı beyyineden izhâr-ı acz edip istihlâf etmeğin mezbûr es-Seyyid İbrahim Çelebi’ye vech-i muharrer üzere müdde‘î-yi mezbûrun bin sekiz yüz seksen akçelikden <> mâ‘adâ ekmeğin almayıp meblağ-ı bâkī bin iki yüz on akçe cihet-i merkūmeden zimmetinde edâsı lâzım deyni olmadığına mezbûr İbrahim Çelebi’ye yemîn teklîf olundukda ol dahi alâ-vefki’l-mesûl yemîn billâhi ale’l-a‘lâ etmeğin mûcebince makbûzu olan bin sekiz yüz seksen akçenin yüz seksen akçesini haffâflık mukābelesinde takās edip bâkī bin altı yüz doksan iki akçenin mezbûr Haçuk’a def‘ine mezbûr es-Seyyid İbrahim Çelebi’ye tenbîh olundukdan sonra meblağ-ı bâkī iki bin iki yüz on akçe da‘vâsından dahi müdde‘î-yi merkūm es-Seyyid İbrahim Çelebi’ye bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmsi’s-sâdis ve’l-işrîn min-şehri Ramazani’l-mübârek li-sene isneyn ve seb‘în ve elf. Şuhûdü’l-hâl: Zeki b. Halil, Kasab Mustafa b. Mehmed, Osman Beşe b. Çukadâr, Ali Beşe b. Sarrâc, Baba Rasûl b. Rıdvan.