İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 417 Hüküm no: 442 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Abdullah’ın sepeti içinde Ali b. Abdünnebi’ye ait paranın Histofor v. İstavridi tarafından çalındığı zannıyla açılan davanın kabul edilmediği Yemîn. Mahmiye-i İstanbul’da Küçükkaraman’da Ebussuûd Efendi odalarından birinde sâkin Ali b. Abdünnebi nâm kimesne meclis-i şer‘de yine ol odaların birinde sâkin işbu hâmilü’s-sifr Histofor v. İstavri nâm zimmî muvâcehesinde üzerine da‘vâ ve takrîr-i kelâm edip bundan akdem oda-i mezbûrede sâkin olan hazır bi’l-meclis Ahmed b. Abdullah nâm kimesnenin sepeti içinde bi-tarîkı’l-emâne on beş esedî guruşu emânet vaz‘ eylediğimden dört esedî guruş alıp bâkī on bir guruşu sepet içinde iken sepedin dibi delinip ahz olunmağın hâlâ mezbûr Histofor ahz eylediği mazannem olmuşdur suâl olunup alıverilmek murâdımdır dedikde gıbbe’s-suâl ve’l-inkâr ve akībe’l-işhâd ityân-ı beyyineden izhâr-ı acz edip istihlâf etmeğin mezbûr Ahmed’in odası içinde olan sepetin dibini delip mezbûr Ali’nin on bir esedî guruşunu ahz etmediğine mezbûr Histofor’a yemîn teklîf olundukda ol dahi alâ-mâ hüve’l-mesûl halfü billâhillezî enzele İncîle alâ-İsa aleyhi’s-selâm etmeğin bilâ-beyyine mu‘ârazadan men‘ birle mâ-vaka‘a bi’t-taleb ketb olundu. Fî 25 Ramazanü’l-mübârek li-sene isneyn ve seb‘în ve elf. Şuhûdü’l-hâl: es-Sâbıkūn.