İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 418 Hüküm no: 445 Orijinal metin no: [55b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rizeli Mehmed Reis b. Abdullah’ın ekmekçi Asvador ve ortağı Mardiros’a sattığı buğday parasından kalan miktarını taksitle almayı kabul ettiği Taksît. Sefîne reislerinden Rizeli Mehmed Reis b. Abdullah nâm kimesne meclis-i şer‘de mahmiye-i İstanbul’da Macuncu çarşısında ekmekçi olan bâ‘isü’s-sifr Asvador v. Melki nâm Ermeni muvâcehesinde ikrâr ve takrîr-i kelâm edip bundan akdem mezbûr Asvador’un şerîki olan gāib ani’l-meclis Mardiros nâm Ermeni ile mezbûr Asvador’a her keyli kırk yedişer akçeye olmak üzere iki yüz kırk keyl buğdayı on bir bin iki yüz seksen akçeye bey‘ ve teslîm onlar dahi bi’l-iştirâk iştirâ ve tesellüm eyledikerinden sonra meblağ-ı mezbûrun iki bin akçesini gāib-i mezbûr Mardiros yedinden ve iki bin beş yüz yirmi akçesini merkūm Asvador yedinden tamamen ahz ü kabz edip mâ‘adâsı olan altı bin yedi yüz altmış akçe zimmetlerinde kalmış idi. Hâlâ meblağ-ı bâkī mezbûrun mecmû‘unu mezbûr Asvador’dan taleb eylediğimden def‘aten edâya iktidârı olmamağla taksîte tâlib olmağın târih-i kitâb şehri gāyetinden iki ay tamamına değin her haftada bana sekiz yüz kırk beş akçe vermek üzere meblağ-ı bâkī-yi mezbûru taksît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s sâdis ve’l-işrîn min-şehri Ramazani’l-mübârek li-sene isneyn ve seb‘în ve elf. Şuhûdü’l-hâl: Karabaş Mehmed Beşe, Hasan Beşe Çukadâr, Mehmed b. Ramazan, Abdi Çelebi b. Hüseyin, Rasûl b. Rıdvan.