İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 419 Hüküm no: 446 Orijinal metin no: [55b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. Hasan’ın Kasap Mehmed b. Mehmed’e sattığı sığır parasından kalan borcunu ödemesi için tenbih edildiği İstimhâl. Celeb tâifesinden işbu bâ‘isü’l-kitâb Mustafa Çelebi b. Hasan meclis-i şer‘de Mehmed b. Mehmed nâm kasab mahzarında üzerine da‘vâ edip mezbûr Mehmed Beşe ile şerîki gāib ani’l-meclis Karcı Hüseyin Beşe zimmetlerinde yedimden iştirâ eyledikleri sığır bahâsından on dört bin sekiz yüz akçe hakkım olup bundan akdem iki bin sekiz yüz akçesini te’hîr edip bâkī olan on iki bin akçenin altı bin akçesini mezbûr Mehmed ve altı bin akçesini dahi gāib-i mezbûr Hasan Beşe vermeğe ta‘ahhüd eylediler idi suâl olunup müte‘ahhid olduğu altı bin akçeyi mezbûrdan alıverilmek taleb ederim dedikde gıbbe’s-suâl mezbûr Mehmed cevâbında müdde‘î-yi mezbûr şerîkim ile ancak on üç bin beş yüz akçe deynim olup meblağ-ı mezbûrdan bin beş yüz akçesini teslîm edip bâkī on iki bin akçenin altı binini ben ve altı binini şerîkim gāib-i mezbûr müdde‘î-yi merkūm Mustafa Çelebi’ye edâya müte‘ahhid olduk idi deyü on bin üç beş yüz akçesini ikrâr ve ziyâde bin üç yüz akçesini inkâr edicek müdde‘î-yi mezbûrdan ziyâde-i mezbûreyi mütebeyyin beyyine taleb olundukda ityân-ı beyyine için <> istihlâf etmeğin mehl-i şer‘î ile imhâl olundukdan sonra ikrârı mertebesi olan on üç bin beş yüz akçeden edâsına müte‘ahhid olduğu altı bin akçeyi müdde‘î-yi mezbûra edâ ve teslîme mezbûr Mehmed’e tenbîh birle mâ-vaka‘a bi’t-taleb ketb olundu. Fi’l-yevmi’s sâlis ve’l-aşer min-şehri Ramazani’l-mübârek li-sene isneyn ve seb‘în ve elf. Şuhûdü’l-hâl: Mehmed Beşe b. Mustafa el-mübâşir, Ali b. Muharrem, Mustafa b. Ahmed, Halil b. Mehmed, Abdülkerim b. Mehmed.