İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 420 Hüküm no: 447 Orijinal metin no: [56a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi ile kardeşi Fâtıma Hatun’un muhallefatının mirasçıları arasında olan davanın anlaşmayla sonuçlandığı Meblağ: 550.000. Beş yüz elli bin, bedel-i sulhdan kabz. Vilâyet-i Rumeli’nde Hersek sancağında Çaniçe kazâsına tâbi‘ İbrayil nâm karye sükkânından Mehmed Çelebi ve Salih Bey ibney Memişah nâm kimesneler meclis-i şer‘de işbu râfi‘u’l-kitâb fahrü’l-akrân Salih Ağa b. Hasan mahzarında her biri ikrâr ve takrîr-i kelâm edip bundan akdem kazâ-i mezbûrdan nakl-i şer‘î ile mezbûr Salih Ağa’yı mûrislerimiz olup mahmiye-i İstanbul’da Süleymâniye mahallesi sükkânından iken müte‘âkiben vefât eden Mustafa Çelebi ile karındaşı Fâtıma Hatun bt. Yüncü Mahmud Ağa’nın muhallefâtına vâzı‘u’l-yed olan vâlideleri Sâliha Hatun bt. Ahmed Çavuş’dan ikimize intikāl eden hisse-i şer‘iyemizi da‘vâ ve taleb ve ahz ü kabza ve lâzım gelirse mezbûre Sâliha Hatun ile sulh ve ibrâya vekîl ve nâib-i menâb nasb ve ta‘yîn edip ol dahi ba‘de kabûlü’l-vekâle müteveffiyân-ı mezbûrân Mustafa Çelebi ve Fâtıma’nın metrûkâtlarına vâzı‘atü’l-yed olan mezbûre Sâliha Hatun ile hisse-i şer‘iyemizden tehârüc-i şer‘î tarîki üzere bi’l-vekâle cümlesi beş yük elli bin akçe olmak üzere on bir kese akçeye müsâlaha edip bedel-i sulh-ı mezbûru yedlerinden ahz u kabz eylemiş idi. El-hâletü-hâzihî mezbûr Salih Ağa’nın bedel-i sulh olmak üzere makbûzu olan cümlesi beş yük elli bin akçe üzere on bir kese akçeyi bi’t-tamam ve’l-kemâl mezbûr Salih Ağa yedinden alıp kabz eyledik min-ba‘d mezbûr Salih Ağa yedinde bedel-i sulh-ı mezbûrdan bir akçe ve bir habbe bâkī kalmadı dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 min-Ramazani’l-mübârek li-sene isneyn ve seb‘în ve elf. Şuhûdü’l-hâl: Ahmed Ağa b. Bali Beşe, Osman Çelebi b. Ömer Efendi, Ali Çelebi b. Yusuf Sipâhî.