İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 431 Hüküm no: 463 Orijinal metin no: [57b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cavid Efendi vakfı mukataasından olup Şeyhülislam Abdurrahman Efendi tarafından Defterdâr Salih Efendi’ye satılan arsa Mübâya‘a. Bi’l-fi‘l Dârü’l-hilâfeti’l-aliyye Kostantıniyeti’l mahmiyede mesned-nişîn-i şerî‘at-i şerîfe-i garrâ olan a‘lemü’l-ulemâ’i’l-ızâm efdalü’l-fuzelâ’i’l fihâm yenbû‘u’l-fezâil ve’l-meâli metbû‘i’l-efâzıl ve’l-e‘âlî el-müstağnî zâtuhü’ş-şerîf an-ıtnâbi’l-elkāb yeftehiru bi-zâlike’l-cenâb ağnî bihi hazret-i Abdurrahman Efendi neclü’l-müvellâ el-merhûm Şeyh Efendi meclis-i şer‘-i şerîf-i Ahmedî ve mahfil-i dîn-i münîf-i Muhammedî’de işbu kitâb-ı ta‘dâd intisâbın sahibi olup hâlâ menâsıb-ı Osmâniye’den Defter Emâneti mansıbı ile şerefyâb olan umdetü’l-emâcid ve’l-ekârim câmi‘ü’l-mehâmid ve’l-ekârim Salih Efendi neclü’l-merhûm Abdülhamid Efendi mahzarında ikrâr edip akd-i âtî sudûruna dek taht-ı tasarrufumda olup mahmiye-i mezbûrede Ser-bıçakcı mahallesinde vâki‘ bir tarafı ba‘zan Mismârîzâde Mustafa Çelebi mülkü olup hâlâ Zülgaffar reis sâkin olduğu menzil ve ba‘zan merhûm Şeyh Mehmed Efendi mülkü olup hâlâ İbrahim Çelebi sâkin olduğu menzil ve bir tarafı ba‘zan el-Hâc Selim mülkü ve ba‘zan Hırbacızâde Mehmed Çelebi mülküne ve ba‘zan el-Hâc Hasan b. Ali sâkin olduğu vakf menzile ve bir tarafı ba‘zan Keresteci Halil mülkü olup hâlâ Ali Paşa kızı Hanım sâkine olduğu menzile ve ba‘zan tarîk-i âmma ve bir tarafı tarîk-i âmma müntehî ve mahdûd olup cevânib-i erba‘ası mülküm olan taş duvarları ve üç bi’r-i mâ ve bir fevkānî mahzen ve bir tahtânî mahzen ve bir hamam ve mâ’-i câriyi hâvî kanavât-ı memlûkemi ve sâire enkāzını müştemil olup arsasının senede merhûm Cavid Efendi vakfına bin akçe mukāta‘ası olan muhterik menzil arsasını cümle tevâbi‘ ve levâhıkı ile mûmâ-ileyh Salih Efendi’ye iki yük akçeye bâtten bey‘ ve teslîm ol dahi ber-minvâl-i muharrer iştirâ ve kabûl ve kabz ve tesellüm eyledikden sonra semeni olan meblağ-ı mezbûr iki yük akçeyi tamamen mezbûr Salih Efendi yedinden alıp kabz eyledim ba‘de’l-yevm keyfe mâ yeşâ mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Hurrire fi’l-yevmi’s-sâbi‘ min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Efdalü’l-müderrisîn Abdurrahman Efendi, Mefharu’l-a‘yân Mehmed Ağa ser-muhzırân, Mefharu’l-kuzât Muslu Efendi, Umdetü’l-meşâyih İvaz Efendi, Mefharu’l-a‘yân İbrahim Ağa b. ( ), Ali Ağa b. Oruc, Keşfî Mustafa Efendi b. Muharrem, Fahrü’l-müderrisîn el-Hâc Mustafa Efendi, Burûsî Hüseyin Efendi, Ahîzâde Ahmed Efendi kâtibü’l-hurûf.