İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 434 Hüküm no: 469 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe b. İbrahim’in Mehmed Beşe b. Yusuf’u zevcesine küfrettiğinden dolayı darp ettiği Mahmiye-i İstanbul’da Küçük Karaman’da Paşaodaları sâkinlerinden olup gulâm-ı acemiyândan râfi‘u’l-kitâb Mehmed Beşe b. İbrahim meclis-i şer‘-i hatîr-i lâzımü’t-tevkīrde Mustafa Beşe b. Yusuf muvâcehesinde üzerine da‘vâ ve takrîr-i kelâm edip mezbûr Mustafa Beşe târih-i kitâbdan ba‘de’z-zuhr Küçük Karaman’da boyacı dükkânı önünde bi-gayr-ı vechin eliyle ağzıma darb edip ön dişimin birini oynatmışdır suâl olunup mûcebi icrâ olunmak matlûbumdur dedikde gıbbe’s-suâl mezbûr Mustafa Beşe cevâbında zevcem hâzıra bi’l-meclis olan Fâtıma bt. Musa’ya fâhişe deyü şetm etmekle ben dahi vech-i muharrer üzere elim ile darb eyledim deyü zevcesine şetm eylediğin iddi‘â ve darb eylediğini ikrâr eyledikden gıbbe’l-istintâk mezbûr Mehmed Beşe müdde‘î-i mezbûrun zevcesi mezbûre Fâtıma’ya fâhişe deyü şetmin inkâr etmeğin mezbûr Mustafa’dan müdde‘âsını mübeyyine beyyine taleb olundukda udûl-ı ricâlden Mehmed b. Abdullah ve İbrahim Beşe b. Şaban nâm kimesneler meclis-i şer‘de li-ecli’ş-şehâde hâzırân olup fi’l-hakīka mezbûr Mustafa Beşe mezbûre Fâtıma Hatun’a fâhişe deyü bizim huzûrumuzda şetm eyledi biz bu husûsa şâhidleriz şehâdet dahi ederiz deyü her biri edâ-yı şehâ[de]t-i şer‘iye eylediklerinde ba‘de’t-ta‘dîl ve’t-tezkiyeti’ş-şer‘iye şehâdetleri makbûle olmağın mûcebince ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sâbi‘ min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Veli b. Mahmud, Memi b. Mehmed, Abdullah b. Mehmed, Ahmed b. Mustafa Beşe, Hüseyin b. Mehmed Beşe el-mübâşir.