İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 435 Hüküm no: 470 Orijinal metin no: [58b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Abdullah’ın Ayasofya-i kebir Vakfı’na ait olan bakkal dükkânını mütevellisinin izniyle İsmail b. Mehmed’e ferağ eylediği Mübâya‘a-i dükkân Mahmiye-i İstanbul’da ( ) sâkine Hadîce bt. Abdullah nâm Hatun tarafından husûs-ı câ’îye vekîl olup bi-mâ hüve tarîkı’s-sübût vekâleti sâbit olan zevci Mustafa b. Mehmed meclis-i şer‘de İsmail b. Mehmed mahzarında bi’l-vekâle üzerine da‘vâ edip Tahtelkal‘a (Tahtakale) kurbünde vâki‘ Ayasofya-i kebîr Vakfı’ndan lede’l-ahâlî ma‘lûmü’l-hudûd olup müvekkilem mezbûre Hadice’nin icâreteyn-i ma‘lûmeteyn ile mutasarrıfe olduğu bakkāl dükkânını târih-i kitâbdan beş sene mukaddem fevt olan Mahmud nâm kimesneye mütevellîsi izni ile altmış üç bin akçe bedel mukābelesinde bi’l-vekâle ferâğ ve bedel-i mezbûru yedinden kabzeyledikden sonra birkaç gün isti‘mâl eyledim deyü ol dükkân içinde olan on küp ve sekiz kantar ve ikişer kat bakır dirhemlik ile dört terâzi ve üç bakır yavye? ve sekiz tabla ve on katravi? ve on beş bal ve yağ fuçularını isti‘âb edip isti‘mâl üzere iken bilâ-veled fevt oldukda ol dükkânı mütevellîsinden istîcâr eyledikde ol âlâta dahi İsmail vaz‘-ı yed etmekle bi’l-vekâle mezbûrdan taleb ederim suâl olunsun dedikde gıbbe’s-suâl mezbûr İsmail cevâbında fi’l-vâki‘ vekîl-i mezbûr karındaşım mezbûr Mahmud’a zikrolunan dükkânı vekâleten ferâgat eyledikde altmış bin akçe bedel mukābelesinde ferâğ ve tefvîz ol dahi kabz ve zikrolunan âlâtı üç bin akçeye bey‘ ve teslîm ol dahi iştirâ ve tesellüm edip bedel ve semeni altmış üç bin akçeyi vekîl-i mezbûra teslîm edip mutasarrıf iken bilâ-veled fevt oldukda ol dükkânı cânib-i vakıfdan aldığımdan sonra verâseti zevce-i metrûkesi Âişe bt. Habil nâm Hatun ile bana münhasıra ve muhallefâtının selâse-i erbâ‘ı ırsen bana intikāl eyledikde ol âlât dahi benim hisseme ta‘yîn olundu deyü def‘le mukābele eyledikde gıbbe’l-istintâk ve’l-inkâr mezbûr İsmail’den def‘-i mezbûru için beyyine taleb olundukda udûl-ı Müslimînden Mehmed Beşe b. Cafer ve Mustafa Beşe b. Oruc nâm kimesneler li-ecli’ş-şehâde meclis-i şer‘de hâzırân olup gıbbe’l-istişhâd fi’l-vâki‘ vekîl-i mezbûr Mustafa Bey târih-i mezbûrda ol vekâleti zevcesi tarafından müteveffâ-i mezbûr Mahmud Beşe’ye huzûrumuzda altmış bin akçe bedel mukābelesinde mütevellîsi izni ile ferâğ ve ol dahi tefvîz ve kabûl ve üç bin akçeye âlât-ı mezbûreyi bey‘ ve teslîm ol dahi iştirâ ve tesellüm edip bedel-i mezbûr altmış bin akçe ile semen-i mezbûr üç bin akçe ki cem‘an altmış üç bin akçeyi vekîl-i mezbûra teslîm ol dahi kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iye eylediklerinde ba‘de ri‘âyet-i şerâ’iti’l-kabûl, şehâdetleri makbûl olmağın vekîl-i mezbûr Mustafa Bey bî-vech mu‘ârazadan men‘ birle mâ hüve’l-vâki‘ bi’t-taleb ketb olundu. Fi’s-sânî ve’l-işrîn min-Ramazani’l-mübârek li-sene isneyn ve seb‘în ve elf. Şuhûdü’l-hâl: Hüseyin Efendi el-Burûsî, Mustafa Efendi el-kâtib, Ahmed Efendi el-kâtib, Keşfî Mustafa Efendi el-kâtib, Abdi Çelebi b. Hüseyin.