İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 436 Hüküm no: 471 Orijinal metin no: [58b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hasan Çelebi b. Osman’ın kızı Ümmühan’ın vekaletinin Mustafa’da olduğu İsbât-ı vekâlet Mahrûse-i Bursa’da Yenibezzâz mahallesi sükkânından olup bundan akdem vefât eden Hasan Çelebi b. Osman’ın hasran vârisesi olan sulbiye sagīre kızı Ümmühan sagīrenin vasîyy-i şer‘iyesi olan min-tarafi’l-eb ceddesi Gülşah Hatun b. Abdülvahhab tarafından meblağ-ı câ’i’z-zikri ahz u kabza iddi‘â-i vekâlet eden el-Hâc Mustafa b. İbrahim Efendi meclis-i şer‘-i hatîrde mahmiye-i İstanbul’da Alipaşa-yı Atîk mahallesi sükkânından olup müteveffâ-i mezbûrun medîne-i Selanik’de zimem-i nâsda olan kadife bahâsından ve sâir defter-i kassâm mûcebince metrûkâtından yüz seksen yedi riyâlî guruşa bi-tarîkı’l-emâne vâzı‘u’l-yed olan iş bu râfi‘u’l-kitâb Süleyman Çelebi b. Mehmed mahzarında üzerine da‘vâ edip müteveffâ-i mezbûrun medîne-i mezbûrda kadife bahâsından zimem-i nâsda olan akçesi ile ber-mûceb-i defter-i kassâm sâir muhallefâtından bi-tarîkı’l-emâne mezbûr Süleyman Çelebi’nin makbûzu olan yüz seksen yedi riyâlî guruşu vekâletim hasebiyle mezbûrdan hâlâ taleb eylediğimde bana teslîmden imtinâ‘ eder suâl olunup teslîme tenbîh olunmak murâdımdır dedikde gıbbe’s-suâl mezbûr Süleyman Çelebi cevâbında ber-minvâl-ı muharrer mezbûrun terekesinden yüz seksen yedi riyâlî guruşu ahz u kabz eylediğini ikrâr lâkin müdde‘î-i mezbûrun vasîyy-i merkūme tarafından vekâletini inkâr edicek müdde‘î-i mezbûrdan vekâletini mübeyyine beyyine taleb olundukda udûl-ı ricâl-i Müslimînden olup mahrûse-i mezbûrda Alacamescid mahallesi sükkânından Ahmed Çelebi b. Hasan ve Hacı Baba mahallesi sükkânından Halil Beşe b. Mahmud nâm kimesneler li-ecli’ş-şehâde meclis-i şer‘de hâzırân olup istişhâd olundukda fi’l-vâki‘ müteveffâ-i mezbûrun kızı sagīre-i mezbûrenin ceddesi ve vasîyy-i şer‘iyesi olan mezbûre Gülistan Hatun sagīre-i mezbûreye babasından intikāl edip mezbûr Süleyman Çelebi’nin ber-minvâl-ı muharrer makbûzu olan yüz seksen yedi riyâlî guruşu ahz u kabz ve kendine îsâl [ve] tarafından mezbûr el-Hâc Mustafa’yı bizim huzûrumuzda vekîl ve nâib-i menâb nasb ve ta‘yîn ol dahi kabûl ve hıdemâtın edâya müte‘ahhid oldu biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iye eylediklerinde gıbbe ri‘âyet-i şerâ’iti’l-kabûl şehâdetleri makbûle olmağın mûcebince ba‘de’l-hükm vekîl-i mezbûr Hacı Mustafa takrîr-i kelâm edip meblağ-ı mezbûr yüz seksen yedi riyâlî guruşu mezbûr Süleyman Çelebi yedinden tamamen ahz u kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’t-tâsi‘ ve’l-işrîn min-Ramazani’l-mübârek sene 1072. Şuhûdü’l-hâl: es-Seyyid Mahmud Çelebi b. ( ), el-Hâc Mustafa b. Lütfullah, el-Hâc İsmail b. Mehmed, Mustafa Çelebi b. Mehmed, el-Hâc Mehmed b. Mustafa, Mehmed Bey b. İbrahim, Gazanfer b. Tevekkül.