İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 437 Hüküm no: 472 Orijinal metin no: [59a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. İbrahim’in Ali Çelebi’ye çiftlik satışı Bey‘-ı çiftlik. Mahmiye-i İstanbul’da Süleymâniye mahallesinde sâkin el-Hâc Ahmed Ağa b. İbrahim tarafından husûs-ı âti’z-zikri ikrâra vekîl olup Mahmud Çelebi b. Abdurrahman el-müezzin ve Hüseyin Bey b. Abdullah şehâdetleri ile şer‘an vekâleti sâbite olan Mehmed Efendi b. Yusuf mahzarında bi’l-vekâle ikrâr ve takrîr-i kelâm edip vilâyet-i Rumeli’nde Nevrekob kazâsı muzâfâtından Vulkova nâm karyede vâki‘ akd-i âtî sudûruna değin müvekkilim mezbûr el-Hâc Ahmed Ağa’nın silk-i mülkünde ve taht-ı tasarrufunda olup bir tarafdan Hasan Beşe mülküne ve bir tarafdan Evrenos b. Musa mülküne ve bir tarafdan yine kendi tasarrufumda olan merhûm Gedik Ahmed Paşa Evkāfı tarlaları ve bir tarafdan tarîk-i âm ile mahdûd olup büyût-ı adîde ve havlumu müştemil çiftlik ta‘bîr olunur mülk menzilimin-bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık mezbûr Ali Çelebi’ye iki bin beş yüz akçeye bâtten bey‘ ol dahi ber-minvâl-ı muharrer iştirâ ve kabûl eyledikden sonra yine karye-i mezbûr sınırı ve hudûdu dâhilinde vâki‘ olup çiftlik-i mezbûr ile mutasarrıf olan lede’l-ahâlî ve’l-cîrân ma‘lûmü’l-hudûd ve’l-kıt‘a tarlalarımın hakk-ı tasarrufların dahi sahib-i arz ma‘rifetiyle iki bin beş yüz akçeye mezbûr Ali Çelebi’ye ferâğ ve tefvîz ol dahi ber-minvâl-ı muharrer tefevvüz ve kabûl eyledikden sonra cem‘an semen-i mezbûr ile bedel-i tefevvüz olan beş bin akçeyi tamamen mezbûr Ali Çelebi yedinden müvekkilim mûmâ-ileyh el-Hâc Ahmed Ağa alıp kabz edip menzil-i mahdûd-ı mezbûr ile tarlaları mahallerinde kabz ve tasarrufa müşteri-i mezbûrîni taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-yevmi’s-sâbi‘ min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Mehmed Efendi b. İbrahim el-kādî, Hüseyin Ağa b. Osman kethudâ, Ahmed Bey el-cündî, Mustafa Ağa b. Ali Ağa, Abdullah b. Mehmed Bey, Mustafa Beşe b. Derviş, Hüseyin Bey el-cündî, İbrahim Halîfe el-cündî