İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 441 Hüküm no: 479 Orijinal metin no: [59b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih Ağa b. Ali tarafından Mehmed Ağa b. Ali’ye ev satışı Mübâya‘a. Mahmiye-i İstanbul’da Hoca Üveys mahallesinde sâkin Salih Ağa b. Ali tarafından zikri âtî menzili bey‘ ve kabz-ı semen ve deynini edâ ve îfâ ve fazlasını kendiye îsâle, azl ve in‘izâlden masûne vekâlet-i devriye ile vekîl olup vekâleti hasm-ı câhid muvâcehesinde İsmail Efendi b. Ahmed ve Ali Çelebi b. Yusuf şehâdetleri ile şer‘an sâbite olan umdetü erbâbü’t-tahrîr ve’l-kalem zübdetü ashâbi’t-tastîr ve’r-rakām Murtaza Efendi b. Mehmed meclis-i şer‘-i hatîrde Dergâh-ı âlî yeniçerilerinin on birinci bölüğüne mahsûs odanın çorbacısı olan umdetü’l-a‘yân Mehmed Ağa b. Ali tarafından ikrâr-ı âtîyi tasdîka vekîl olup Receb Yazıcı b. Mehmed ve İbrahim b. Mustafa şehâdetleri ile şer‘an vekâleti sâbite olan fahrü’l-eşbâh Mehmed Odabaşı b. Mustafa mahzarında bi’t-tevliye ikrâr ve takrîr-i kelâm edip akd-i âtî sudûruna değin müvekkil-i mezbûr Salih Ağa’nın mülkü ve hakkı olup mahalle-i mezbûrda vâki‘ bir tarafı Ömer Subaşı mülküne ve bir tarafı Peştemalci el-Hâc Ali mülküne ve bir tarafı ba‘zan Hadîce Hatun mülküne ve ba‘zan Şaban Ağa Vakfı’na ve bir tarafı tarîk-i âmma müştemil büyûtu hâvî mülk menzili cemî‘ tevâbi‘i ve levâhıkı ve kâffe-i hukūk-ı hudûd ve merâfıkı ile müvekkil-i mezbûr Mehmed Ağa’ya tarafeynden îcâb ve kabûlü hâvî bey‘-ı bâtt-ı sahîh-i şer‘î ile yüz doksan bin fıddî râyic fi’l-vakt akçeye vekâlet-i mahkiyem hasebiyle bey‘ ve teslîm ol dahi iştirâ ve tesellüm ve kabûl ve kabz eyledikden sonra semeni olan meblağ-ı mezbûr yüz doksan bin akçeyi tamamen mezbûr Mehmed Ağa yedinden ahz u kabz edip ba‘de’l-yevm menzil-i mahdûd-ı mezbûr mesfûr Mehmed Ağa’nın mülk-i müşterâsıdır. Keyfe mâ yeşâ’ mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ min-Şa‘bân-ı mu‘azzam sene 1072. Şuhûdü’l-hâl: Derviş Efendi b. Emrullah, Osman b. Ömer, Yusuf b. Abdullah, İbrahim b. Mustafa, Ömer Beşe b. Osman, Ahmed Beşe b. Mehmed.