İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 442 Hüküm no: 480 Orijinal metin no: [59b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Ali’nin Yusuf Beşe b. Abdullah’a ev satışı Mübâya‘a. Dergâh-ı âlî yeniçerilerinin on birinci ağa bölüğüne mahsûs oda ahâlîsinin hâlâ çorbacısı olan umdetü’l-emâcid ve’l-a‘yân Mehmed Ağa b. Ali tarafından husûs-ı âti’l-beyânı ikrâra vekîl olup Ömer Çelebi b. Mustafa ve Mahmud Efendi b. Abdurrahman şehâdetleri ile şer‘an vekâleti sâbite olan Receb Yazıcı b. Mehmed meclis-i şer‘de işbu râfi‘u’l-kitâb Yusuf Beşe b. Abdullah nâm kimesne mahzarında ikrâr ve takrîr-i kelâm edip mahmiye-i İstanbul’da Hoca Üveys mahallesinde vâki‘ bir tarafı Ömer Şubaşı ve bir tarafı Peştemalci el-Hâc Ali mülküne ve bir tarafı ba‘zan Hadîce Hatun mülküne ve ba‘zan Şaban Ağa Vakfı’na ve bir tarafı tarîk-i âmma müştemil büyût-ı müte‘addideyi hâvî mülk menzili cemî‘ tevâbi‘i ve levâhıkı ve kâffe-i hukūk menâfi‘ ve merâfıkı ile müvekkilim mûmâ-ileyh Mehmed Ağa mezbûr Yusuf Beşe’ye tarafeynden îcâb ve kabûlü hâvî bey‘-ı bâtt-ı sahîh-i şer‘î ile yüz doksan bin akçeye müvekkilim mûmâ-ileyh es-Seyyid Mehmed Ağa müşteri-i mezkûr Yusuf Beşe yedinden bi’t-tamam ve’l-kemâl ahz u kabz eyledim, ba‘de’l-yevm hudûd-ı mezbûre ile mahdûd olan menzil müşteri-i merkūm Yusuf Beşe’nin mülk-i müşterâsıdır mutasarrıf olsun dedik [60a] gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ min-Şevvali’l-mükerrem li-sene isneyn ve seb‘în ve elf. Şuhûdü’l-hâl: İsmail Odabaşı b. Nuh, Osman Beşe b. Ömer, Kasab Mehmed Beşe b. Abdullah, Mehmed Beşe b. Abdullah, Salih Çelebi b. Mustafa, Osman Çavuş b. Mehmed, Ahmed b. Mehmed, Ömer b. Abdullah, Ömer b. Receb, Siyavuş b. Abdullah ve gayruhum.