İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 443 Hüküm no: 481 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Mansur’un Mahmud b. Mehmed’e ev ve arsa satışı Mübâya‘a-i menzil ve arsa. Fi’l-asl vilâyet-i Anadolu’da Trabzon sancağında Sürmene kazâsına tâbi‘ Avanos nâm karyesi sâkinlerinden olup İstanbul’da Camcı mahallesinde sâkin Ali b. Mansur meclis-i şer‘de bâ‘is-i hâze’l-kitâb Mahmud b. Mehmed mahzarında ikrâr-ı takrîr-i kelâm edip karye-i mezbûrede vâki‘ bir tarafı Selim mülküne ve bir tarafı Zülfikar mülküne ve bir tarafı Lütfi b. Aydın mülküne ve bir tarafı tarîk-i âmma müştemil mülk menzil arsasına ve arsa-i mezkûreye karîb lede’l-ahâlî ve’l-cîrân ma‘lûmü’l-hudûd iki kıt‘a bahçeli ve yine karye-i merkūmede Zülfikar nâm kimesne mülküne muttasıl bir kıt‘a ve Hasan nâm kimesne mülküne muttasıl bir kıt‘a ve Mustafa b. İlyas nâm kimesne mülküne muttasıl bir kıt‘a ve Derviş nâm kimesne mülküne muttasıl bir kıt‘a ve Koz yeri demekle ma‘rûf bir kıt‘a cem‘an beş kıt‘a mülk arsalarımı mezbûr Mahmud’a safka-i vâhide ile iki bin akçeye tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ol dahi iştirâ ve kabûl eyledikden sonra semeni olan meblağ-ı mezbûr iki bin akçeyi müşteri-i mezbûr yedinden tamamen azh u kabz eyledim. Ba‘de’l-yevm mahdûd-ı mezkûr ile iki kıt‘a bahçe ve arsalar müşteri-i mezbûrun mülk-i müşterâsı olup mahâllinde kabz ve tasarrufa merkūm Mahmud’u taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Şevvali’l-mükerrem li-sene isneyn ve seb‘în ve elf. Şuhûdü’l-hâl: İbrahim b. Mehmed, Timur b. Mustafa, Ramazan b. Bayram, Bekir b. Süleyman, Ramazan b. Ahmed, Mahmud Beşe b. Mehmed, Mustafa Çelebi b. Pîrî, Abdülkerim b. Hamza, Yusuf b. Abdullah.