İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 443 Hüküm no: 482 Orijinal metin no: [60a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Ahmed’in tımar hissesini Süleyman b. Mustafa’ya satması Teslîm-i hisse-i tımar, meblağ: 6.000. Vilâyet-i Rumeli’nde Vidin kasabasında Mezarlık mahallesinden İbrahim b. Ahmed meclis-i şer‘de bâ‘isü’r-rakīm Süleyman b. Mustafa tarafından ikrâr-ı âti’z-zikri tasdîka vekîl-i şer‘îsi olan Ali Ağa b. Ömer mahzarında ikrâr-ı sahîh-i şer‘î ve i‘tirâf-ı sarîh-i mer‘î kılıp Halomiç kazâsına tâbi‘ Megalidivri nâm karye ve gayrı ze‘âmetin kırk dört bin akçe hissesi mezbûr Ali Ağa’nın ve altı bin yedi yüz elli akçesi Halil nâm kimesnenin berat-ı şerîf ile tasarrufunda olup mezbûr Halil fevt olmağla ben mezbûrun hissesi mahlûlünden üzerime berat ettirmişidim hâlâ hisse-i mezbûr Süleyman’a hüsn-i ihtiyârım ile altı bin akçeye ferâğ olup berat ve temessükâtımı mezbûr[a] teslîm edip ol dahi alıp kabz eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ min-Şevvali’l-mükerrem li-sene isneyn ve seb‘în ve elf. Şuhûdü’l-hâl: İbrahim b. Mehmed, Rasûl b. Rıdvan, Hasan b. Bayram, Abdi b. Hüseyin, el-Hâc Ahmed b. Mahmud.