İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 444 Hüküm no: 483 Orijinal metin no: [60a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun ile Hüseyin Bey b. Mustafa’nın muhâlaa ile boşanması Hul‘ ma‘a ibrâ-i tarafeyn. Mahmiye-i İstanbul’da Debbağyusuf mahallesinde sâkine Havva Hatun tarafından husûs-ı câ’i’z-zikre vekîl olup mezbûrenin zâtını ma‘rifet-i şer‘iye ile ârifân olan Ahmed Bey b. Osman ve Mustafa Çelebi b. el-Hâc Ali nâm kimesneler şehâdetleri ile şer‘an vekâleti sâbite olan babası Mustafa Bey b. Osman meclis-i şer‘de dâmadı Hüseyin Bey b. Mustafa mahzarında bi’l-vekâle ikrâr ve takrîr-i kelâm edip mezbûr Hüseyin Bey kızım ve müvekkilem mezbûr Havva Hatun’un zevci olup zimmetinde mütekarrir ve ma‘kūdün aleyh olan üç bin beş yüz akçe mehr-i mü’ecceleden bin akçesin benden alıp bâkī kalan iki bin beş yüz akçesi ve nafaka-i iddet-i ma‘lûmesi üzerlerine ve me’ûnet-i süknâsı dahi kızım mezbûre Havva’nın üzerine olmak üzere bi’l-vekâle mezbûr Hüseyin Bey ile muhâla‘a-i sahîha-i şer‘iye ile muhâla‘a eyledikde ol dahi mezbûru kabûl eyledikden sonra zevciyete ve gayra müte‘allika cemî‘ de‘âvîden bi’l-vekâle mezbûr Hüseyin Bey’in zimmetini ibrâ ve ıskāt ve ol dahi kızım müvekkilem mezbûr Havva’nın zevciyet ve gayra müte‘allika cemî‘ da‘vâdan zimmetini ibrâ ve ıskāt eyledi dedikde mâ-vaka‘a bi’t-taleb ketb olundu. Fi’l-yevmi’s-sânî min-Şevvali’l-mükerrem li-sene isneyn ve seb‘în ve elf. Şuhûdü’l-hâl: es-Seyyid Mehmed b. Abdülkadir, Süleyman Efendi b. İbrahim, Gülâbî b. İbrahim, Mustafa b. İbrahim, Mustafa b. el-Hâc Ali, Ali Çelebi b. Osman, Receb b. Ali, Osman b. Ahmed.