İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 445 Hüküm no: 484 Orijinal metin no: [60a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Muharrem’in Mustafa Halife’ye ev satışı Mülknâme. Vilâyet-i Anadolu’da Beyşehri kazâsına tâbi‘ Afşar nâm karye sâkinelerinden Fâtıma bt. Muharrem nâm hatunun zevci ve tarafey[n]den husûs-ı âti’l-beyâna vekîl olup mezbûrenin zâtını ma‘rifet-i şer‘iye ile ârifân yine karye-i mezbûre sükkânından Süleyman Bey b. Hızır ve Arslan Bey b. Mustafa şehâdetleri ile şer‘an vekâleti sâbite olan Mehmed Bey b. Mirza nâm cündî mahfil-i kazâda işbu bâ‘isü’l-kitâb Mustafa Halîfe b. Habib nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûrenin silk-i mülk-i sahîhinde münselik olup mahmiye-i İstanbul’da Debbağzâde mahallesinde vâki‘ bir tarafdan merhûm Yusuf Efendi odaları ve bir tarafdan ba‘zan Râbia Hatun ve ba‘zan Hammâl Mustafa ve ba‘zan Burnaz Ahmed mülkleri ve bir tarafı ba‘zan Derviş ve ba‘zan müşteri-i mezbûr mülkleri ve bir tarafı tarîk-i âm ile mahdûd iki bâb fevkānî ve iki bâb tahtânî odaları ve bir sofalı ve bir kenîf ve müşteri-i mezbûr ile müşterek su kuyusunu müştemil mülk menzili bi-cümleti’t-tevâbi‘ ve kâffetü’l-menâfi‘ ve’l-merâfık yirmi üç bin fıddî râyic fi’l-vakt akçeyi vekâleti hasebiyle mezbûr Mustafa Çelebi’ye tarafeynden îcâb ve kabûlü hâvî bey‘-ı bâtt-ı sahîh-i şer‘î ile ol dahi vech-i muharrer üzere iştirâ ve kabûl ve kabz ve tesellüm eyledikden sonra semeni olan meblağ-ı mezbûr yirmi üç bin akçeyi mezbûr Mustafa Halîfe yedinden tamamen ahz u kabz eyledim. Ba‘de’l-yevm menzil-i mahdûd-ı mezbûr Mustafa Halîfe’nin mülk-i müşterâsıdır keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Fahrü’l-eimme Şaban Efendi, umdetü’l-mevâliyi’l-izâm Ahmed Efendi b. Abdülcabbar, Ali Efendi mevlânâ, Hüseyin Efendi b. Mehmed, Ali b. Ramazan, Hüseyin b. Receb, Hüseyin Bey b. Ramazan, Ahmed b. Mehmed, Mustafa b. Mehmed, Ahmed b. Yakub, Mustafa b. ( ) el-kayyûm el-bevvâb, Ahmed b. Mustafa el-kayyum, Hüseyin b. Eyüb el-kayyum, Derviş Mehmed b. ( ), Burnaz Ahmed b. ( ), Kebabcı Mehmed Beşe.