İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 445 Hüküm no: 485 Orijinal metin no: [60b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. İbrahim’in Kâtib Mustafa Vakfı’na istiğlal yoluyla sattığı evini kiralaması Mübâya‘a bi-tarîkı’l-istiğlâl. Mahmiye-i İstanbul’da İsmail Ağa mahallesinde sâkin İsmail b. İbrahim nâm kimesne meclis-i şer‘de Kâtib Mustafa Vakfı’na bi’l-fi‘il mütevellî olan el-Hâc İbrahim b. Sefer nâm kimesne tarafından ikrâr-ı âti’l-beyânı tasdîka vekîli olan işbu bâ‘isü’l-vesîka Ahmed Halîfe b. Mehmed mahzarında ikrâr ve takrîr-i kelâm edip mahalle-i mezbûrede vâki‘ bir tarafı el-Hâc Mehmed mülkü ve bir tarafı Râbia Hatun mülkü ve iki tarafı tarîk-i âm ile mahdûd bir bâb fevkānî oda ve bir sofa ve bir kilâr ve bi’r-i mâyı müştemil mülk menzili bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık müvekkil-i mezbûr el-Hâc İbrahim her biri dokuzar dirhem olmak üzere yetmiş beş riyâlî guruş ve her biri sekizer dirhem olmak üzere altmış beş riyâlî guruş ki cem‘an yüz elli riyâlî guruşa menzil-i mahdûd-ı mezbûru merkūma bi-tarîkı’l-istiğlâl bey‘ ve teslîm edip ol dahi vakf-ı mezbûr mâlı ile iştirâ ve tesellüm ve kabûl eyledikden sonra semeni olan yüz elli riyâlî guruşu müvekkil-i mezbûr yedinden tamamen ahz u kabz eyledikden sonra yine menzil-i mahdûd-ı mezbûru ba‘de’t-tahliyeti’ş-şer‘iye ve’t-takābuzı’l-mer‘î târihü’l-kitâbdan beher sene tamamına değin mütevellî-i merkūm bin sekiz yüz akçe ücret ile bana îcâr ve teslîm edip ben dahi istîcâr ve tesellüm ve kabûl eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis min-Şevvali’l-mükerrem li-sene isneyn ve seb‘în ve elf. Şuhûdü’l-hâl: İbrahim Çelebi b. Halil, Ömer Efendi b. İsa, Mehmed Efendi b. Mehmed el-imâm, Mahmud b. İbrahim, Ahmed b. İbrahim, İbrahim b. Cafer, Mehmed b. Abdullah, Rasûl b. Rıdvan.