İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 447 Hüküm no: 487 Orijinal metin no: [60b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Mustafa’nın atının basarak öldürdüğü Halil b. Mustafa için ödediği diyet İbrâ. Mahmiye-i İstanbul’da Davudpaşa mahallesi ahâlîsinden Hüseyin b. Mustafa nâm şâbb-ı emred meclis-i şer‘de Halil b. el-Hâc Mustafa nâm sagīrin vasîyy-i şer‘îsi Reftar bt. Abdullah tarafından ikrâr-ı câ’i’z-zikri tasdîka vekîl olup nehc-i şer‘î üzere vekâleti sâbite olan Mustafa Ağa b. Mehmed mahzarında bi-tav‘ihiikrâr ve takrîr-i kelâm edip târih-i kitâbdan yirmi gün mukaddem bir at üzerine bindiğimden sonra ürküp koşdukda başın zabtedemeyip ol at mezbûr [Halil b.] el-Hâc Mustafa’yı basıp öldürdükde bana diyet lâzım gelir dememden sagīr-i mezbûr için vasîsi mezbûra beş bin beş yüz akçe olmak üzere dört bin beş yüz nakd akçe ve bin akçe kıymetli bir çukalı tîrkeş vermiş idim el-hâletü hâzihî bana diyet lâzım gelmediğine âlim olmağla meblağ-ı mezbûr beş bin beş yüz akçe da‘vâsından sagīr-i mezbûru ibrâ-i âmm [ve] kātı‘u’n-nizâ‘ ile ibrâ ve ıskāt eyledim dedikde gıbbe’t-tasdîkı’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Hüseyin Efendi el-Burûsî, Hasan Efendi el-mukayyid, İnebahtı alaybeyi Süleyman Ağa, fahrü’l-kuzât Fazlı Efendi, Abdi Çelebi b. Hüseyin ve gayruhum.