İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 447 Hüküm no: 488 Orijinal metin no: [60b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Efendi b. Mustafa’nın Yusuf b. Abdullah’daki alacağı tahsil ettiği Sulh, ibrâ. Mahmiye-i İstanbul’da Karagümrük kurbünde vâki‘ medrese sâkinlerinden Ali Efendi b. Mustafa meclis-i şer‘de işbu râfi‘u’l-kitâb Yusuf b. Abdullah muvâcehesinde ikrâr ve takrîr-i kelâm edip mezbûr Yusuf zimmetinde beynimizde adedi ma‘lûm müşterâ ve makbûz sahtiyân semeninden yirmi dokuz guruş hakkım olup meblağ-ı mezbûrun on iki guruşunu bundan akdem yedinden ahz u kabz edip bâkī on yedi guruş hakkım kalmışdır deyü da‘vâ ve taleb eylediğimde ol dahi vermede ta‘allül etmeğin beynimizde münâza‘ât-ı kesîre vâkı‘a olmuş idi el-hâletü hâzihî tavassut-ı muslihîn ile benimle bin iki yüz akçe üzerine inşâ-i akd-i sulh eylediklerinde, ben dahi sulh-ı merkūmu kabûl ve bedel-i sulh olan meblağ-ı mezbûru tamamen ahz u kabz edip mâ‘adâ da‘vâdan mezbûr Yusuf’un zimmetini ibrâ-i âmm [ve] kātı‘u’n-nizâ‘la ibrâ ve ıskāt eyledim. Mazmûn-ı kitâba muhâlif da‘vâ zuhûr ederse lede’l-hükkâmi’l-kirâm makbûle ve mesmû‘a olmaya dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-işrîn min-Ramazani’l-mübârek li-sene isneyn ve seb‘în ve elf. Şuhûdü’l-hâl: Ali b. Veli, Rasûl b. Rıdvan, Abdi Çelebi b. Hüseyin, Mustafa Çelebi b. İsa