İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 453 Hüküm no: 498 Orijinal metin no: [61b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çelebi b. Ahmed’in Şeyhülislam Yahya Efendi Vakfı’na ait evi mütevellisi marifetiyle eşi Safiye bt. Ali ve kayınatası Sâliha bt. Aliye satışı Mübâya‘a Mahmiye-i İstanbul’da Hasan Halîfe mahallesinde sâkin Ali Çelebi b. Ahmed nâm kimesne meclis-i şer‘de sahibü’l-kitâb mezbûr Ali Çelebi’nin zevcesi Safiye bt. Ali ve kayınatası Sâliha bt. el-Hâc Ali nâm hatunlar tarafından ikrâr-ı câ’i’z-zikri tasdîka vekîlleri olan Ali b. Halil nâm kimesne mahzarında ikrâr ve takrîr-i kelâm edip merhûm Şeyhülislâm Yahya Efendi Vakfı’ndan olup mahmiye-i mezbûrda Alipaşa-yı Atîk mahallesinde vâki‘ bir tarafdan Receb Beşe nâm kimesne menziline ve bir tarafdan Hoşdilhan nâm hatun menziline ve bir tarafdan Attar Şaban Çelebi menziline ve taraf-ı râbi‘i tarîk-i âmma müntehî bir bâb tahtânî ve bir bâb fevkānî odalı ve dehlizi ve bir su kuyusunu hâvî icâreteyn-i ma‘lûmeteyn ile taht-ı tasarrufumda olan menzilimin nısf-ı şâyi‘ini ma‘rifet-i mütevellî ile zevcem mezbûre Safiye Hatun’a altı bin akçeye ferâğ ve tefvîz ve nısf-ı şâyi‘-i âharını dahi kayınatam mezbûre Sâliha Hatun’a sekiz bin akçeye ferâğ ve tefvîz edip onlar dahi vech-i muharrer üzere tefevvüz ve kabûl eyledikden sonra semenleri olan meblağayn-ı mezbûreyni merkūmetân Safiye ve Sâliha hatunların yedlerinden alıp tamamen kabz eyledim. Ba‘de’l-yevm menzil-i mezbûr merkūmetânın hakk-ı müfevvazlarıdır dedikde gıbbe’t-tasdîk mâ-vaka‘a bi’t-taleb ketb olundu. Fî 10 min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Mustafa Çelebi b. Yusuf, Ömer Efendi el-müezzin, Şaban Çelebi b. Abdullah, el-Hâc Mahmud b. Mansur, Hamza Beşe b. Bilal, Veli b. Mahmud, Mehmed Efendi b. Ahmed, İbrahim Çelebi b. Ömer, Abdullah b. Yusuf, Abdi b. Hüseyin.