İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 454 Hüküm no: 499 Orijinal metin no: [62a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Dimo’nun Hacı Mehmed Ağa’ya olan borcunu kabul ettiği İkrâr-ı deyn, meblağ: 70.000. Mahrûse-i Galata a‘mâlinden kasaba-i Tophâne’de Sultan Bâyezid mahallesinde sâkin Hacı Mehmed Ağa b. Bayram tarafından husûs-ı âti’l-beyânı da‘vâya vekîl olup vekâleti bi-mâ hüve nehcü’s-sübût şer‘an sâbite olan dâmadı Abdürrefi Çelebi b. Ferhad nâm kimesneye meclis-i şer‘de mahrûse-i mezbûreye tâbi‘ kasaba-i Beşiktaş’da Sinanpaşa mahallesinde sâkin Yanaki v. Dimo nâm zimmî mahzarında üzerine da‘vâ ve takr[î]r-i kelâm edip müvekkil-i merkūm el-Hâc Mehmed Ağa’nın mezbûr Yanaki zimmetinde cihet-i deyn-i şer‘îden üç yük kırk bin akçe hakkı olup meblağ-ı mezbûrun iki yük yetmiş bin akçesi mukaddemâ mezbûr Yanaki müvekkil-i merkūm Hacı Mehmed Ağa’ya def‘ ü teslîm edip meblağ-ı mezbûrun bâkī zimmetinde yetmiş bin akçe hakkı kalmış idi. Hâlâ meblağ-ı mezbûr yetmiş bin akçeyi merkūm Yanaki’den bi’l-vekâle taleb ederim suâl olunsun dedikde gıbbe’s-suâl merkūm Yanaki cevâbında fi’l-vâki‘ müvekkil-i mezbûr Hacı Mehmed Ağa’nın cihet-i mezkûre zimmetimde üç yük kırk bin akçe hakkı olup mukaddemâ meblağ-ı mezbûrun iki yük yetmiş bin akçesini müvekkil-i merkūm Hacı Mehmed Ağa’ya def‘ ü teslîm edip meblağ-ı mezkûrdan zimmetimde bâkī lâzımü’l-edâ yetmiş bin akçe deynim vardır deyü ikrâr ve i‘tirâf etmeğin alâ-mûceb-i ikrârihî meblağ-ı bâkī-i mezbûr yetmiş bin akçeyi vekîl-i mezbûr Abdürrefi Çelebi’ye edâ ve teslîme merkūm Yanaki’ye tenbîh birle mâ-vaka‘a bi’t-taleb ketb olundu. Fi’l-yevmi’s-sânî aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Fahrü’l-kuzât Ahmed Efendi b. Muharrem, Davud Ağa b. Abdullah, Mehmed Çelebi b. Osman el-münâdî.