İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 455 Hüküm no: 500 Orijinal metin no: [62a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Osman’ın Hüseyin Ağa’ya dükkân satışı Mübâya‘a. Mahmiye-i İstanbul’da Çoban Çavuş mahallesi sükkânından Mehmed Çelebi b. Osman meclis-i şer‘de hâlâ yeniçeri ocağında zağarcıbaşılık mansıbı ile şeref-yâb olan fahrü’l-emâcid ve’l-ekârim câmi‘ü’l-mehâmid ve’l-mekârim işbu kitâb sahibi el-Hâc Hüseyin Ağa b. ( ) tarafından ikrâr-ı âti’z-zikri tasdîka vekîl-i şer‘î olan Ahmed Çelebi b. el-Hâc Mehmed mahzarında ikrâr ve takrîr-i kelâm edip akd-i âtî sudûruna değin silk-i mülkümde olup mahmiye-i mezbûrede Lâleliçeşme karşısında vâki‘ bir tarafdan mûmâ-ileyh el-Hâc Hüseyin Ağa mülküne ve bir tarafdan Hammâmî Ali Çelebi mülküne ve iki tarafdan tarîk-i âmma müntehî ve mahdûd dört kepenk bakkāl dükkânımı bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık yüz bin akçeye mezbûr el-Hâc Hüseyin Ağa’ya bâtten bey‘ ve teslîm ol dahi ber-minvâl-ı muharrer iştirâ ve tesellüm ve kabûl eyledikden sonra semeni olan meblağ-ı mezbûr yüz bin akçeyi bi’t-tamam ve’l-kemâl ahz u kabz eyledim. Ba‘de’l-yevm dükkân-ı mezbûr mûmâ-ileyh Hüseyin Ağa’nın mülk-i müşterâsıdır mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Mehmed Ağa b. Şaban bölük: 26, Mustafa Çelebi b. Abdullah, Mustafa Çelebi b. Mehmed Kâtib Ağa, Mahmud Efendi b. İbrahim, Hasan Çelebi b. Salih el-yesârî, Ahmed Beşe b. Mehmed, Hasan Beşe b. Abdullah.