İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 455 Hüküm no: 501 Orijinal metin no: [62a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nezir Ağa b. İbrahim’in Mehmed Çavuş b. Yusuf’a olan borcunu kabul ettiği İkrâr-ı deyn. İşbu râfi‘u’l-kitâb fahrü’l-akrân Mehmed Çavuş b. Yusuf meclis-i şer‘de fahrü’l-akrân Nezir Ağa b. İbrahim mahzarında üzerine da‘vâ ve takrîr-i kelâm edip târih-i kitâbdan iki sene mukaddem Sofu Dilaver Paşa Van muhâfızı oldukda merkūm Nezir Ağa kethudâsı olmağla benden kendi nefsi için iki yüz şerîfi altın istikrâz ve kabz ve zirâ‘ı on guruşdan yüz guruşa on endâze prankon yeşil çuka iştirâ ve kabz ve ben dahi zikrolunan altını ikrâz ve tesellüm ve ol çukayı bey‘ ve teslîm eylemiş idim suâl olunup alıverilmek taleb ederim dedikde gıbbe’s-suâl mezbûr Nezir Ağa cevâbında fi’l-vâki‘ müdde‘î-i mezbûre ber-minvâl-ı muharrer karzdan iki yüz şerefî altın ile çuka bahâsından yüz kıt‘a riyâlî guruş deynim vardır deyü bi-tav‘ihiikrâr etmeğin alâ-mûceb-i ikrârihî edâsına tenbîh birle mâ-vaka‘a bi’t-taleb ketb olundu. Fi’l-yevmi’l-aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Mustafa Çavuş b. Mehmed el-mübâşir, Ali Efendi b. Nasuh, Mustafa b. İsa, Hasan b. Mehmed, Veli b. Mahmud.