İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 456 Hüküm no: 503 Orijinal metin no: [62a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Efendi varislerinin Ali b. Hasan ile Mercan Çarşısı’ndaki mahzen davasında sulh oldukları Sulh. Vilâyet-i Anadolu’da Larende kasabasında sâkin iken bundan akdem fevt olan el-Hâc Hüseyin’in sulbî kebîr oğulları es-Seyyid Mehmed ve es-Seyyid Ramazan ve es-Seyyid Ali nâm kimesneler meclis-i şer‘de bâ‘isü’r-rakīm el-Hâc Ali b. el-Hâc Hasan mahzarında her biri ikrâr ve i‘tirâf edip mahmiye-i İstanbul’da Mercan Çarşısı’nda vâki‘ Pîrîpaşa Hanı dâhilinde olup merhûm Pîrî Paşa Vakfı’ndan olan ma‘lûmü’l-hudûd bir bâb mahzen babamız el-Hâc Hüseyin’in icâre-i mu‘accele ve müeccele-i ma‘lûmeteyn ile ale’l-vefât taht-ı tasarrufunda olup vefât eyledikde zikrolunan mahzen intikāl-i âdî ile bize intikāl etmiş idi mesfûrdan da‘vâ ve taleb eylediğimizde ol dahi târih-i kitâbdan otuz üç sene mukaddem mezbûr el-Hâc Hüseyin bana ol târihde vakf-ı mezbûra mütevellî olan Zuhûrî Efendi ma‘rifetiyle bana yüz guruş mukābelesinde ferâğ ve tefvîz ben dahi tefevvüz ve kabûl ve vaz‘-ı yed eyledim ana binâen vaz‘-ı yed ederim deyicek biz dahi ferâğ-ı mezbûru inkâr eylediğimizde beynimizde münâza‘ât-ı kesîre cereyân etmiş idi el-hâletü hâzihî tavassut-ı muslihîn ile da‘vâ-yı mezbûrdan sekiz bin akçe üzerine mezbûr el-Hâc Ali bizimle sulh oldukda biz dahi sulh-ı mezbûru kabûl ve bedel-i sulh olan meblağ-ı mezbûru el-Hâc Ali yedinden bi’t-tamam ahz [62b] u kabz eyledik ba‘de’l-yevm husûs-ı mezbûra müte‘allika mezbûr el-Hâc Ali ile vechen mine’l-vücûh ve sebeben mine’l-esbâb da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâlis min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Emrullah Ağa b. Mahmud, Abbas Efendi b. Süleyman, Ali Ağa b. ( ), Yusuf Bey el-cündî, Ahmed Efendi el-kādî, Hasan Beşe, el-mübâşir, Yusuf Beşe b. ( ), Hamza Beşe.