İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 457 Hüküm no: 504 Orijinal metin no: [62b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İlyas Ağa b. Sinan ile Selim Ağa b. Osman’ın aralarındaki alış veriş davasından sulh oldukları Sulh, ibrâ. Mahmiye-i İstanbul’da Zircirlikuyu kurbünde sâkin İlyas Ağa b. Sinan meclis-i şer‘de Selim Ağa b. Osman tarafından husûs-ı âti’z-zikri tasdîka vekîl olup bi-mâ hüve nehcü’s-sübût şer‘an vekâleti sâbit olan li-ebeveyn karındaşı Mahmud Ağa mahzarında ikrâr ve i‘tirâf edip mezbûr Selim Ağa bir re’s kır atını mukaddemâ bana bey‘ murâd eyledikde işbu atım otuz bin akçe eder deyü beni ta‘zîr etmekle ben dahi mezbûrun cevâbına binâen zikrolunan atı otuz [-bin] akçeye iştirâ ve kabz ve def‘-i semen etmiş idim lâkin kıymeti yirmi bin akçe olmağla tağrîrine binâen bey‘-ı mezbûr fesholunup zikrolunan atı red ve semenini istirdâd eylediğimde ol dahi tağrîrini inkâr etmekle beynimizde münâza‘ât-ı kesîre cereyân etmiş idi el-hâletü hâzihî tavassut-ı muslihîn ile da‘vâ-yı mezbûreden merkūm Selim Ağa benimle dört bin akçe üzerine sulh olundukda ben dahi sulh-ı mezbûru kabûl ve bedel-i sulh olan meblağ-ı mezbûr dört bin akçeyi mezbûr Selim Ağa yedinden bi’t-tamam ahz u kabz edip husûs-ı mezbûra müte‘allik da‘vâdan mezbûrun zimmetini ibrâ ve ıskāt eylediğimden gayrı mukaddemâ mezbûr Selim Ağa’ya hîbe ve teslîm eylediğim bir re’s tayı ba‘de’r-rücû‘ mezbûrun yedinden ahz u kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Mehmed Çelebi b. ( ) el-cündî, Hasan Ağa b. Abdullah, Ali Çelebi b. İlyas, Rasûl b. Rıdvan, Mehmed b. Ramazan, Abdi b. Hasan, Mustafa b. İsa, Hasan b. Bayram.