İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 458 Hüküm no: 505 Orijinal metin no: [62b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dellak Ali Beşe b. Mehmed’in İdris Beşe b. Sinan’a bağ satışı Mübâya‘a-i bağ. Mahmiye-i İstanbul’da Acemoğlanı meydânında vâki‘ hamamda mütemekkin Dellâk Ali Beşe b. Mehmed nâm kimesne meclis-i şer‘de işbu bâ‘isü’l-vesîka İdris Beşe b. Sinan mahzarında ikrâr ve takrîr-i kelâm edip akdin sudûruna değin silk-i mülkümde münselik olup vilâyet-i Rumeli’nde Avlonya sancağında Premedi kazâsına tâbi‘ Gavriçe nâm karye bâğātında vâki‘ bir tarafdan karındaşım Sinan Beşe bağına ve bir tarafdan Hüseyin Beşe bağına ve bir tarafdan Hasan Beşe bağına ve taraf-ı râbi‘i tarîk-i âmma müntehî bağı tarafeynden îcâb ve kabûlü hâvî bey‘-ı bâtt-ı sahîh-i şer‘î ile mezbûr İdris Beşe’ye dört bin fıddî râyicü’l-vakt akçeye bey‘ edip ol dahi ber-vech-i muharrer iştirâ eyledikden sonra semeni olan meblağ-ı mezkûrdan bin akçeyi yedinden tamamen alıp kabz edip bağ-ı mezbûru mahâllinde kabz ve tasarrufa mezbûr İdris Beşe’yi taslît eyledim. Ba‘de’l-yevm bağ-ı mezbûrda alâka ve medhalim kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Mehmed Beşe b. Hüseyin, Süleyman Beşe b. Kurt, Durmuş Beşe b. Aydın, Ali Beşe b. Hüseyin, Ali Beşe b. Sinan, Osman Beşe b. Yakub, Abdünnebi Beşe b. Osman, Abdi Çelebi b. Hüseyin, Kasap Mustafa el-muhzır.