İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 459 Hüküm no: 507 Orijinal metin no: [62b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veli b. Mustafa’dan alacak iddiasında bulunan Lamyo v. Apostol’un davasına delil gösteremediğinden davanın reddedildiği Yemîn. Mahmiye-i İstanbul’da mumcu tâifesinden Lamyo v. Apostol nâm zimmî meclis-i şer‘de hâfızü’l-vesîka el-Hâc Veli b. Mustafa nâm kimesne mahzarında üzerine da‘vâ edip mezbûr târih-i kitâbdan bir sene mukaddem vilâyet-i Rumeli’nde Cum’a kazâsına tâbi‘ Katafiye nâm karyede zâbit iken benden iki bin akçe ikrâz ve kabz etmiş idi hâlâ meblağ-ı mezbûru mezbûr el-Hâc Veli’den taleb ederim suâl olunsun dedikde gıbbe’s-suâl mezbûr el-Hâc Veli ber-vech-i muharrer meblağ-ı mezbûru ikrâz ve kabz etmeyi inkâr edicek müdde‘î-i mezbûr Lamyo’dan müdde‘âsı için beyyine taleb olundukda ityân-ı beyyineden âciz olup istihlâf etmeğin mezbûr el-Hâc Veli vakt-i mezbûrda meblağ-ı mezbûru istikrâz ve kabz eylemediğine ba‘de’t-tahlîf yemîn billâhi’l-aliyyü’l-azîm eyledikden sonra mezbûr Lamyo bilâ-beyyine mu‘ârazadan men‘ birle mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Hüseyin Efendi el-Burûsî, Abdi Çelebi b. Hüseyin, Mustafa Çelebi b. İsa, Veli Beşe b. Mahmud, Baba Rasûl b. Rıdvan.