İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 459 Hüküm no: 508 Orijinal metin no: [62b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Mehmed’in kocası Ahmed Beşe b. Abdullah’dan muhâlaa ile boşandığı Hul‘ ibrâ. Mahmiye-i İstanbul’da Şah Sultan mahallesinde sâkine Havva bt. Mehmed nâm hatun tarafından vech-i âtî üzere hul‘ ve ibrâya vekîl olup mezbûrenin zâtını ma‘rifet-i şer‘iye ile ârifân olan Mustafa Halîfe b. Mehmed el-müezzin ve Kurt Beşe b. Halil nâm kimesneler şehâdetleri ile şer‘an vekâleti sâbit olan Hasan b. Mehmed nâm kimesne meclis-i şer‘de müvekkilesi mezbûr Havva’nın zevci Ahmed Beşe b. Abdullah mahzarında bi’l-vekâle ikrâr ve takrîr-i kelâm edip mezbûr Ahmed Beşe müvekkilemin zevci olup zimmetinde mütekarrir ve ma‘kūdun-aleyh olan iki bin beş yüz akçe ve nafaka-i iddet-i ma‘lûmesi üzerlerine ve me’ûnet-i süknâ dahi müvekkilemin üzerine olmak üzere mezbûr Ahmed Beşe ile muhâla‘a-i sahîha-i şer‘iye ile muhâla‘a eylediğimde ol dahi kabûl eyledikden sonra hukūk-ı zevciyet ve gayrıya müte‘allika cemî‘ de‘âvîden asâleten ve vekâleten her birimiz âharın zimmetini ibrâ-i âmm ile ibrâ ve ıskāt eyledik dedikde gıbbe’t-tasdîk mâ-vaka‘a bi’t-taleb ketb olundu. Fî aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Bayram Beşe b. Ahmed, Mehmed b. ( ) el-anbârî, Ahmed Çelebi b. Mehmed, er-râcil, Ahmed b. Abdülcabbar, Tarcı Murad, Bostancı Mustafa b. Mehmed er-râcil.