İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 460 Hüküm no: 509 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Murad b. Mehmed’in mallarının varislerine taksimi ve varislerin hisselerini birbirlerine satışı Bey‘-ı çiftlik ve değirmen ve tarla. Mahmiye-i İstanbul’da Derviş Ali mahallesinde sâkin iken bundan akdem vefât eden el-Hâc Murad b. Mehmed’in verâseti zevceteyn-i metrûketeyn Fâtıma bt. Üveys ve Cemile bt. İsrail’e ve sulbî kebîre oğulları Ali Çelebi ve Receb ve Mustafa ve Mehmed ve Hasan ve İsmail’e ve sulbiye kebîre kızları Fâtıma ve Sâliha ve Âişe ve Saime’ye münhasıra olup kable’l-kısme mezbûr Mustafa dahi vefât edip verâseti li-ebeveyn er karındaşı mezbûr Ali Çelebi ile li-ebeveyn kız karındaşı mezbûre Fâtıma’ya münhasıra olup kable’l-kısme zevce-i mezbûre Fâtıma dahi vefât edip verâseti sadrî kebîr oğulları mezbûrûn Receb ve İsmail ve Hasan ile ve âhar zevcden sagīr oğlu İbrahim ve sadriye kızları mezbûretân Sâliha ve Âişe’ye münhasıra olduğu ve bi-tarîkı’l-münâsahati’l-mezkûre tashîh-i meseleleri bin dokuz yüz yirmi sehimden olup sihâm-ı mezbûreden yüz yirmi sehm zevce-i mezkûre Cemile’ye ve üç yüz elli sehm mezbûr Ali Çelebi’ye ve babası Murad ile karındaşı müteveffâ-i sânî Mustafa’dan ve iki yüz otuz dört sehm mezbûr Receb’e babası ile vâlidesi müteveffât-i sâlis Fâtıma’dan ve iki yüz otuz dört sehm dahi kezâlik mezbûr Hasan’a ve iki yüz otuz dört sehm dahi kezâlik mezbûr İsmail’e ve iki yüz on sehm ancak babasından mezbûr Mehmed’e ve yüz yetmiş beş sehm babası mezbûr Murad ile karındaşı mezbûr Mustafa’dan merkūme Fâtıma’ya ve babaları ile vâlidelerinden yüz on yedi sehm mezbûretân Sâliha ve Âişe’den her birine ve yüz beş sehm ancak babasından mezbûre Saime’ye ve yirmi dört sehm ancak vâlidesinden mezbûr İbrahim’e intikāl ve isâbet eylediği ve mezbûrân Ali Çelebi ve Fâtıma zikri câ’î mülk-i çiftlik ve değirmende olan hisse-i mezkûrelerinden bundan akdem karındaşları mezbûrân Receb ve İsmail Çelebi’ye iştirâk-i seviy vechi üzere semeni ma‘lûm makbûza bey‘ eyledikleri ve mezbûre Âişe dahi yüz on yedi sehm hissesin karındaşı İsmail Çelebi’ye semen-i ma‘lûm makbûza bey‘ eylediği ve dahi çiftlik-i mezbûr ile tasarruf olunan ma‘lûmü’l-hudûd ve’l-kıt‘a tarlalarda olan altı sehimden bir sehm hissesin mezbûr Ali Çelebi karındaşları mezbûrân Receb ve İsmail Çelebi’ye sahibü’l-arz ma‘rifeti ile bedel-i ma‘lûme [ile] fâriğ olduğu şer‘an zâhir oldukdan sonra mezbûr İsmail Çelebi meclis-i şer‘î hatîrde işbu râfi‘u’l-kitâb Ali Beşe b. Mehmed mahzarında ikrâr ve takrîr-i kelâm edip akd-i âtî sudûruna değin ırsen ve şirâ‘en silk-i mülkümde ve taht-ı tasarrufumda olup vilâyet-i Anadolu’da medîne-i Sinop kazâsına tâbi‘ Yenicegazimi? nâm karyede vâki‘ lede’l-ahâlî ve’l-cîrân ma‘lûmü’l-hudûd olup bir bâb oda ve bir anbâr ve bir samanlık ve havluyu müştemil ber-minvâl-ı muharrer bin dokuz yüz yirmi sehm i‘tibâr olunup çiftlik ta‘bîr olunur menzil ve yine karye-i mezbûrede vâki‘ bir göz mülk değirmende olan altı yüz on üç buçuk sehm hisse-i şâyi‘amı bi-cümleti’t-tevâbi‘ ve’l-levâhık mezbûr Ali Beşe’ye otuz esedî guruşa bâtten bey‘ ol dahi ber-minvâl-ı muharrer iştirâ ve kabûl ve yine karye-i mezbûre sınırı ve hudûdu dâhilinde vâki‘ çiftlik-i mezbûr ile tasarruf olunan ma‘lûmü’l-hudûd ve’l-kıt‘a tarlalarda olan altı sehimden buçuk sehm hisse-i şâyi‘amın dahi hakk-ı tasarrufun sahib-i arz ma‘rifetiyle mezbûr Ali Beşe’ye yetmiş esedî guruş bedel mukābelesinde ferâğ ve tefvîz edip ol dahi ber-minvâl-ı muharrer tefevvüz ve kabûl eyledikden sonra cem‘an semen-i mezkûr ile bedel-i tefvîz olan yüz kıt‘a esedî guruşu mezbûr Ali Beşe yedinden tamamen alıp kabz edip zikrleri sebk eden çiftlik ve değirmen ve tarlalarda olan hisse-i merkūmeyi mahallerinde kabz ve temellük ve tasarrufa mezbûr Ali Beşe’yi taslît eyledim ba‘de’l-yevm çiftlik-i mezbûr ve değirmen ve tarlalarda alâka ve medhalim kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Abdullah Çelebi b. ( ), Mustafa Çelebi b. ( ), Mehmed Çelebi b. Mahmud kâtib-i muhâsebe, Mustafa b. Ali, Mustafa Çelebi b. Hüseyin, Hüseyin Çelebi b. Süleyman Çelebi, Muslu Yazıcı Sinobî, Mahmud Sinobî, Ali Çelebi b. İsmail Ağa.