İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 461 Hüküm no: 510 Orijinal metin no: [63a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi’nin varisi olan oğlu Kasım babasından intikal eden arsayı Yusuf Efendi’ye sattığı Mübâya‘a Yusuf Efendi’nin. Husûs-ı âti’l-beyân mahâllinde tahrîr için kıbel-i şer‘den Mevlânâ Keşfî Mustafa Efendi irsâl olunup ol dahi mahmiye-i İstanbul’da Mi‘mâr Sinan-ı Atîk mahallesinde vâki‘ zikri âtî arsa-i hâliyenin üzerine varıp zeyl-i rakīmde muharrerü’l-esâmî olan Müslimîn huzûrunda akd-i meclis-i şer‘-i şerîf eyledikde mahalle-i mezbûrede sâkin iken bundan akdem vefât eden es-Seyyid Mehmed’in verâseti sulbî kebîr oğlu es-Seyyid Kasım ile sulbiye kebîre kızı Şerife Emine’ye münhasıra olup asl-ı meseleleri üç sehimden olup sihâm-ı mezbûrdan iki sehmi mezbûr es-Seyyid Kasım’a ve bir sehmi mezbûre Şerife Emine’ye isâbet eylediği şer‘an zâhir ve müte‘ayyin oldukdan sonra mezbûr es-Seyyid Kasım meclis-i ma‘kūd-ı mezbûrda işbu sahibü’l-kitâb umdetü’l-emâcid ve’l-ekârim Yusuf Efendi b. el-Hâc Hüseyin mahzarında bi-tav‘ihiikrâr ve takrîr-i kelâm edip babam müteveffâ-i mezbûr es-Seyyid Mehmed’in terekesinden olup mahalle-i mezkûrede vâki‘ bir tarafı ba‘zan İbrahim Ağa ve ba‘zan Hızır Beşe mülkleri ve iki tarafı Osmanpaşa Dârü’l-hadîsi ve bir tarafı müşârün-ileyh Yusuf Efendi mülkü ile mahdûd tûlen ve arzan bi-hesâb-ı şatrancî üç yüz otuz zirâ‘ mülk-i mevrûsumuz olan arsanın iki yüz yirmi zirâ‘ arsası iki sehm hissem mukābelesinde bana ve yüz on zirâ‘ arsa li-ebeveyn kız karındaşım mezbûre Şerife Emine’nin hisse-i şâyi‘asına isâbet ve intikāl eyleyip arsa-i mezkûreyi bi’t-terâzi ifrâz ve tahsîs ve mâbeynimizde alâmât-ı fâsıla vaz‘ olunup kabz ve kabûl eylemiş idik hâlâ müşârün-ileyh Yusuf Efendi mülkü ile dârü’l-hadîse muttasıl olan tûlen ve arzan bi-hesâb-ı şatrancî yüz kırk dört buçuk zirâ‘ arsa-i müfrezeyi müşârün-ileyh Yusuf Efendi’ye altı bin nakd-i râyic fi’l-vakt akçeye tarafından îcâb ve kabûlü hâvî bey‘-ı bâtt-ı sahîh-i şer‘î ile bey‘ ve teslîm ol dahi iştirâ ve kabûl ve kabz ve tesellüm eyledikden sonra semeni olan meblağ-ı mezbûr altı bin akçeyi müşârün-ileyh Yusuf Efendi yedinden tamamen ahz u kabz eyledim. Ba‘de’l-yevm zikrolunan yüz kırk dört buçuk zirâ‘ arsa-i müfreze müşârün-ileyh Yusuf Efendi’nin mülk-i müşterâsıdır. Keyfe mâ yeşâ’ mutasarrıf olsun dedikde gıbbe’t-tasdîkı’ş-şer‘î müşârün-ileyh Yusuf Efendi dahi bâyi‘-i mezbûr es-Seyyid Kasım mahzarında ikrâr ve takrîr-i kelâm edip ben dahi mezbûr es-Seyyid Kasım’ın kendi tasarrufunda bâkī kalan arsası üzerine kendi mâlımdan teberru‘an müceddeden bir fevkānî ve bir bâb tahtânî oda binâ ve ihdâs edivermeğe ta‘ahhüd eyledim dedikde vâki‘ hâli mevlânâ-yı mezbûr mahâllinde tahrîr ba‘dehû meclis-i şer‘e gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-işrîn min-Şevvali’l-mükerrem li-sene isneyn ve seb‘în ve elf. Şuhûdü’l-hâl: es-Seyyid Ramazan b. Seyyid Mehmed, Abdurrahman Efendi b. Ahmed Efendi, es-Seyyid Mehmed Çelebi b. es-Seyyid Ramazan, İbrahim Bey b. ( ), Mustafa Beşe b. Durmuş, Şahbaz Beşe b. Abdullah, Mehmed Beşe b. Mustafa, Hüseyin Çelebi b. İsa.