İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 462 Hüküm no: 511 Orijinal metin no: [63b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. Hızır ile Mustafa Bey b. Osman arasındaki bağ ve menzil anlaşmazlığında sulh oldukları Sulh, ibrâ. Vilâyet-i Anadolu’da Eğin kazâsına tâbi‘ Şihrizi/Şirzi nâm karye[de] sâkin olup mukaddemâ fevt olan Hızır b. Ali Bey’in verâseti kebîr oğulları Mehmed Beşe ve Ali Beşe’ye münhasıra olduğu şer‘an sâbit ve zâhir oldukdan sonra mezbûr Ali Beşe meclis-i şer‘de hâfızü’l-vesîka Mustafa Bey bin Osman mahzarında ikrâr ve takrîr-i kelâm edip bundan akdem merhûm mezbûr Ali fevt olup verâseti babam mezbûr Hızır ile sulbiye kebîre kızları Aynî ve Gülizar hatunlara münhasıra olup müteveffâ-i mezbûr Ali Bey’in karye-i mezbûre toprağında vâki‘ bir tarafı Kaya bağına ve bir tarafı tarîk-i âmma ve iki tarafı arz-ı hâliyeye müntehî bir kıt‘a bağı ile bir tarafı Receb Bey menziline ve bir tarafı Osman Bey menziline ve bir tarafı Cayir zimmî menziline ve bir tarafı tarîk-i âmma müntehî büyût-ı adîdeyi müştemil mülk menzili mezbûretân Aynî ve Gülizar babam müteveffâ-i mezbûr Hızır ile beyinlerinde li’z-zekeri mislü hazzi’l-ünseyeyn ba‘de’t-taksîm hisselerin kabz eylediklerinden sonra babam mezbûr Hızır dahi fevt oldukda zikri mürûr eden bağ ve menzilden hissesi karındaşım mezbûr Mehmed Beşe’den dahi hissesini iki bin üç yüz akçeye iştirâ ve kabz etmekle yanlarınca benim hissemi dahi fuzûlen zabtetmiş idi el-hâletü hâzihî ol hissemiz mezbûrdan da‘vâ ve taleb eylediğimde mezbûr Mustafa Bey zabtını ikrâr etmekle beynimize muslihûn tavassut edip zikrolunan hisse da‘vâsından mezbûr benim ile bin üç yüz akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh-ı mezbûru yedinden kabz edip hisse-i merkūmeye müte‘allika da‘vâdan mezbûr Mustafa Bey’i ibrâ ve ıskāt eyledim. Min-ba‘d ol hissem mezbûr Mustafa Bey’in mülkü olup mahâllinde teslîm ve kabzına mezbûru taslît eyledim dedikde gıbbe’t-tasdîk mâ-vaka‘a bi’t-taleb ketb olundu. Fi’t-tâsi‘ min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Mehmed b. Abdi el-mübâşir, Ahmed Bey b. Osman el-cündî, İsmail Beşe b. Abdullah, Mustafa Beşe b. Kurt Beşe, Osman Ağa b. Ahmed, Davud Ağa b. el-Hâc Osman, Hüseyin Efendi el-Burûsî.