İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 463 Hüküm no: 512 Orijinal metin no: [63b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Yusuf’un Abdülbaki Çelebi b. Mehmed’e ev satışı Mübâya‘a. Mahmiye-i İstanbul’da Fâtıma Sultan mahallesi sâkinlerinden Seyyid Mehmed b. es-Seyyid Yusuf el-müezzin meclis-i şer‘de hâfızü’l-kitâb Abdülbaki Çelebi b. Mehmed mahzarında ikrâr ve takrîr-i kelâm edip mahalle-i mezbûrda vâki‘ silk-i mülkümde münselik bir tarafı Osman Ağa odaları ve bir tarafı Fâtıma Hatun mülkü ve bir tarafı Ahmed Çelebi mülkü ve bir tarafı tarîk-i âm ile mahdûd fevkānî ve tahtânî iki bâb odaları ve bir su kuyusunu ve cüneyneyi ve kenîfi müştemil mülk menzili cemî‘ tevâbi‘i [ve] levâhıkı ile merkūm Abdülbaki Çelebi’ye on beş bin nakd-i râyic fi’l-vakt akçeye bey‘-ı bâtt-ı sahîh-i şer‘î ile bey‘ edip ol dahi iştirâ ve kabûl ve tesellüm ettikden sonra semeni olan meblağ-ı mezbûr merkūm Abdülbaki Çelebi yedinden bi’t-tamam ahz u kabz eyledim menzil sâlifü’z-zikr merkūm Abdülbaki Çelebi’nin mülk-i müşterâsıdır, benim alâka ve medhalim kalmadı keyfe mâ yeşâ’ mutasarrıf olsun dedikde gıbbe’t-tasdîk mâ-vaka‘a bi’t-taleb ketb olundu. Fi’s-sânî aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Mehmed Çelebi b. ( ) el-cündî, Ahmed Çelebi b. Ali, el-Hâc Hüseyin b. el-Hâc Şaban müezzin, Mehmed b. Sefer, Mehmed Efendi el-imâm, el-Hâc Şaban b. Hüseyin, Mehmed b. Şehriban.