İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 464 Hüküm no: 513 Orijinal metin no: [63b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haslar Subaşısı Mehmed Beşe b. Mustafa ile Derviş Beşe’nin ziraatçilerden Mustafa b. Mehmed ve Osman b. Mahmud’a yaptıkları muameleden men olunması Mu‘ârazadan men‘. Mahmiye-i İstanbul’da Sancakdâr Hayreddin mahallesinde sâkin işbu râfi‘u’l-kitâb el-Hâc Mustafa b. Mehmed ve Osman b. Mahmud nâm kimesneler meclis-i şer‘de hâlâ Haslar subaşısı Mehmed Beşe b. Mustafa ile Derviş Beşe mahzarlarında üzerlerine takrîr-i da‘vâ edip Silivri ve Topkapısı hâricinde vâki‘ merhûm Sultan Bâyezid Evkāfı arâzisinden mukāta‘a-i kadîme ile tasarrufumuzda olan yerlerin beher sene cânib-i vakf-ı mezbûra mukāta‘asını verip bu ana gelince hâricden bir nefer bizden ve sâir arâzi-i mezbûreyi tasarruf eden kimesnelerden resm nâmına bir akçe ve bir habbe alınagelmiş değil iken hâlâ subaşıyân-ı mezbûrân tasarrufumuzda olan yerlere zirâ‘at eylediğimiz buğday ve sâir hubûbâtdan tarla başına kırkar akçe resm verin deyü hilâf-ı şer‘î biz rencîde ve te‘addîden hâlî değillerdir suâl olunup men‘ olunmak matlûbumuzdur dediklerinde gıbbe’s-suâl subaşıyân-ı mezbûrânın resm taleb için bunlardan temessükleri olmadığından mâ‘adâ cevâb-ı şer‘îleri dahi olmamağın hilâf-ı şer‘ müdde‘iyân-ı mezbûrâna ve sâir arâzi-i mezbûreyi tasarruf edenlere ber-minvâl-ı muharrer resm talebi ile müdâhale ve mu‘ârazadan mezbûrân men‘ olunup mâ-vaka‘a bi’t-taleb ketb olundu. Fi’l-yevmi’l-hâmis min-Şevvali’l-mükerrem li-sene isneyn ve seb‘în ve elf. Şuhûdü’l-hâl: el-Hâc Ahmed b. Mahmud, Abdi b. Hüseyin, Mehmed b. Ramazan, Mustafa b. Ahmed, Mustafa b. İsa.