Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 88 Hüküm no: 72 Orijinal metin no: [11a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey’in alacağını tahsil etmek üzere vekil tayin ettiği Vilâyet-i Rumeli’nde İbrail nâm kasabada hâlâ ticâret üzere olan hâssa bostancılardan Mehmed Bey b. Abdullah tarafından meblağ-ı âti’l-beyân ahz u kabz ve kendüye îsâle vekîl olup vekâleti hasm-ı câhid-i şer‘î mahzarında Mehmed Reis ve Hasan Reis ibney Receb ve Mehmed ve Receb şehâdetleri ile şer‘an sâbit olan tüccâr Kiryako v. Yani nâm zimmî mahfil-i kazâda işbu bâ‘isü’l-kitâb Hüseyin Bey b. Abdullah el-Bostanî mahzarında ikrâr ve takrîr-i kelâm edip müvekkil-i mezbûr Mehmed Bey’in gāib ani’l-meclis Dimitraşko nâm reis zimmetinde doksan bin akçe hakkı olmağla meblağ-ı mezbûru merkūm Dimitraşko’dan almağa merkūm Hüseyin Bey’i tarafından vekîl etmekle mezbûr Hüseyin Bey meblağ-ı mezbûrdan altmış bin akçesini kabz eylemiş idi. El-hâletü hâzihî makbûzu olan altmış bin akçeyi müvekkil-i mezbûr Mehmed Bey’e îsâl etmek için merkūm Hüseyin Bey yedinden bi’t-tamam ve’l-kemâl vekâletim hasebiyle ben ahz u kabz eyledim, zikr olunan altmış bin akçeden merkūm Hüseyin Bey yedinde bir akçe ve bir habbe bâkī kalmadı dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Tahrîren fi’l-yevmi’r-râbi‘ aşer min-şehri Ramazani’l-mübârek li-sene selâse ve sittin ve elf. Şuhûdü’l-hâl: Ali Reis b. Mustafa, Mahmud Reis b. ( ), Mehmed Reis, Hacı Muharrem Ressâm ve gayruhum mine’l-hâzırîn.