İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 464 Hüküm no: 514 Orijinal metin no: [63b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. Süleyman’ın Gülcamii Mahallesi Avarız Vakfı’na istiğlal yoluyla arsa satışı ve arsayı kiralaması İstiğlâl. Mahmiye-i İstanbul’da Uzunçarşı kurbünde Yavaşca Şahin mahallesinde sâkin eş-Şeyh Mehmed Efendi b. Süleyman mahfil-i kazâda mahmiye-i mezbûrda Gülcâmi‘i mahallesi avârızına mevkūfe nükūdun hâlâ mütevellîsi olan eş-Şeyh İsmail Efendi b. Mehmed mahzarında ikrâr ve takrîr-i kelâm edip zikrolunan Yavaşca Şahin mahallesinde vâki‘ bir tarafı Pertev Paşa Vakfı ve bir tarafı Hadîce Hatun menzili ve bir tarafı merkūm Yavaşca Şahin Vakfı ve bir tarafı tarîk-i âm ile mahdûd muhterik mülk menzil arsası mütevellî-i mezbûr Şeyh İsmail Efendi her biri beş dirhem olan elli kıt‘a riyâlî guruşa bey‘ ve teslîm ol dahi ber-vech-i muharrer mal-ı vakf-ı mezbûr ile bi-tarîkı’l-istiğlâl iştirâ ve kabûl ve tesellüm eyledikden sonra semeni olan meblağ-ı mezbûr elli kıt‘a riyâlî guruşu mütevellî-i merkūm yedinden tamamen ahz u kabz edip yine arsa-i mahdûd-i mezbûreyi mütevellî-i merkūm eş-Şeyh İsmail Efendi senede yedi buçuk riyâlî guruşa bana îcâr ve teslîm ve ben dahi vech-i muharrer üzere istîcâr ve kabûl ve kabz ve tesellüm eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Süleyman Efendi b. İbrahim el-imâm, İsmail Çelebi b. Mehmed, İbrahim Çelebi b. Gülâbî, el-Hâc Mehmed b. Karabaş, Ali Beşe b. Muharrem, Veli b. Mahmud, Abdülkerim b. İbrahim el-müezzin.