İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 465 Hüküm no: 515 Orijinal metin no: [63b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebubekir b. Osman’ın Ermeni Baron’daki alacağına Haçuk v. Murad’ın kefil olduğu iddiasını ispatlayamadığı Yemin. Navluncu tâifesinden Ebûbekir b. Osman nâm kimesne meclis-i şer‘de Haçuk v. Murad nâm Ermeni muvâcehesinde üzerine da‘vâ edip iki ay mukaddem gāib ani’l-meclis Baron nâm Ermeni benden her keyli altmış dört akçeden altı bin iki yüz yetmiş iki akçeye doksan sekiz keyl buğday iştirâ ve kabz eyledikde mezbûr Haçuk meblağ-ı mezbûre kefîl oldukdan sonra iki bin altı yüz akçesini mezbûr Baron Ermeni’den alıp bâkī üç bin altı yüz yetmiş iki akçesini almadan firâr etmekle kefâletine binâen mezbûr Haçuk’dan taleb ederim suâl olunsun dedikde gıbbe’s-suâl mezbûr Haçuk kefâlet-i mezbûreyi inkâr eyledikde müdde‘î-i mezbûrdan müdde‘âsı için beyyine taleb olundukda ityân-ı beyyineden âciz olup istihlâf etmeğin mezbûr Haçuk ber-minvâl-ı muharrer meblağ-ı mezbûra kefîl olmadığına ba‘de’t-tahlîf yemîn billâhi’l-aliyyü’l-azîmillezi enzele’l-İncîle alâ-İsa aleyhisselâm etmeğin mezbûr Ebûbekir bilâ-beyyine mu‘ârazadan men‘ birle mâ-vaka‘a bi’t-taleb ketb olundu. Fi’s-sânî min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Hüseyin Efendi el-Burûsî, Keşfî Mustafa Efendi b. Muharrem el-kâtib, Ahmed Efendi el-kādî, Mustafa Çelebi b. Ali el-mahzar.