İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 469 Hüküm no: 523 Orijinal metin no: [64b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ayşe Hatun bt. Ali’nin muhallefatının varisleri kocası Hattat Yusuf Efendi b. Abdurrahman ve kardeşinin oğlu Abdurrahman Efendi arasında paylaşıldığı İbrâ. Mahmiye-i İstanbul’da Samanveren mahallesinde sâkine iken bundan akdem vefât eden Âişe Hatun bt. Ali’nin verâseti zevci Hattât Yusuf Efendi b. Abdurrahman’a ve li-ebeveyn er karındaşı Numan Efendi’nin oğlu olup hâlâ Atebe-i aliyyede baş mukāta‘acılık mansıbı ile müşerref olan fahrü’l-e‘âlî Abdurrahman Efendi’ye münhasıra olduğu şer‘an zâhir oldukdan sonra mûmâ-ileyh Abdurrahman Efendi tarafından husûs-ı âti’z-zikri ikrâra vekîl olup vekâleti Halil b. Fazlı ve Ali Bey b. Osman şehâdetleri ile sâbite olan Mehmed Çelebi b. Osman meclis-i şer‘de müteveffâ-i mezbûrenin metrûkâtına vâzı‘u’l-yed eylediği şer‘an sâbit olan işbu râfi‘u’l-kitâb mezbûr Yusuf Efendi mahzarında bi’l-vekâle ikrâr ve takrîr-i kelâm edip müteveffâ-i mezbûra Sûk-ı Sultanîde bey‘ muhallefât-ı menkūlesi olan esâs-ı beyt ve evânî-i nühâsiye ve sâir eşyâ bahâlarının nısfı olan kırk iki bin akçe ve nükūdunun nısfı olan on dört bin akçe ve sekiz bin akçe mehr-i mü’eccelenin nısfı olan dört bin akçe ve mahalle-i mezbûrda vâki‘ olup yüz on bin akçeye mukaddem olan mülk menzil arsasının nısf hissesi olan elli beş bin akçe ki cem‘an nısf hisse-i şer‘iyesi olan yüz on beş bin akçeyi bi’t-tamam ve’l-kemâl mezbûr Yusuf Efendi yedinden müvekkilem mûmâ-ileyh Abdurrahman Efendi alıp kabz edip min-ba‘d mevrûsem müteveffât-i mezbûrenin kalîl ve kesîr ve celîl ve hakîr ve akār ve menkūl ism-i mâl ıtlâk olunur cümle muhallefâtına müte‘allik de‘âvî ve mutâlebât ve eymân ve muhâsamâtdan mezbûr Yusuf Efendi’nin zimmetini ibrâ-i âmm [ve] kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-a‘şir min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Mustafa Efendi b. Mehmed el-imâm, Halil Ağa b. Mazhar el-cündî, Mehmed Çelebi b. Gazanfer el-yesârî, İsmail Ağa b. Müstecâb Helvâcı?, Murtaza b. Mahmud, Mehmed b. Ali, Mehmed b. Burhan, Mehmed b. Ali, Handan b. Abdullah, Şaban b. Ramazan, Salih b. Ali, Mustafa b. Mahmud, Ahmed b. Mahmud, Sefer Halîfe b. İbrahim el-müezzin.