İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 470 Hüküm no: 524 Orijinal metin no: [64b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Malta’da esir olarak bulunan Yahudi Yosef’in, kendisini esâretten kurtaran Ermeni Sefer b. Bahşi’ye olan diyet borcunu ödemesi Hüccet-i esir ba‘de’l-ihrâc inkâr ve müdde‘î[nin] müdde‘âsını isbât sûretleri. Tüccâr tâifesinden işbu bâ‘isü’s-sifr Kefeli Sefer v. Bahşi nâm Ermeni mahfil-i kazâda Yahûdî tâifesinden olup mukaddemâ cezîre-i Malta’da esir olan Yosef Aynisir? mahzarında üzerine da‘vâ ve takrîr-i kelâm edip târih-i kitâbdan beş ay mukaddem cezîre-i mezbûre Malta’ya ticâret ile varıp mezbûr Yosef cezîre-i mezbûrede Mosi İsbika nâm Efrencin esiri olup mezbûrdan beni altı yüz doksan riyâlî guruşa iştirâ ile ba’del-halâs semen-i mezbûru sana edâ eylerim deyü bana emretmeğin ben dahi emrine binâen merkūmu mezbûr Mosi İsbika’dan altı yüz doksan kıt‘a riyâlî guruş semen-i medfû‘a iştirâ eyledim hâlâ def‘ eylediğim sene-i mezbûru taleb eylediğimde bana edâ ve teslîmden imtinâ‘ eder suâl olunup alıverilmek murâdımdır dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-ı Müslimînden olup târih-i mezkûrda cezîre-i mezbûrede esir olan Ahmed Beşe b. Derviş ve Mustafa Beşe b. Hacı Abdi nâm kimesneler li-ecli’ş-şehâde meclis-i şer‘de hâzırân olup istişhâd olunduklarında fi’l-vâki‘ Yahûdî-i mezbûr Yosef müdde‘î-i merkūm Sefer beni mesfûr Mosi İsbika’dan altı yüz doksan riyâlî guruşa iştirâ ile ba‘de’l-halâs semen-i mezbûru sana edâ eylerim dedi bizim huzûrumuzda emretmeğin vech-i meşrûh üzere emrine binâen altı yüz doksan riyâlî guruş semen-i medfû‘a Yahûdî-i mezbûru müdde‘î-i merkūm Kefeli Sefer iştirâ eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iye eylediklerinde gıbbe ri‘âyet-i şerâ’iti’l-kabûl şehâdetleri makbûle olmağın mûcebince ba‘de’l-hükm mâ-vaka‘a bi’t-taleb ketb olundu. Fi’r-râbi‘ aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Davud Çavuş b. Şaban el-mübâşir, Ali Çavuş b. Rıdvan el-mübâşir, Mustafa b. Mehmed, Hasan Beşe b. Mehmed.