İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 471 Hüküm no: 526 Orijinal metin no: [65a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da ölen Nikola v. Argiri’nin muhallefatının Todori v. Yani’den alınıp varisleri Dyano ve Panorya’ya teslimi Fi’l-asl vilâyet-i Rumeli’nde Livâdiye kazâsına tâbi‘ İsteri nâm karyeden olup mahmiye-i İstanbul’da hâlik olan Nikola v. Argiri nâm zimmînin li-ebeveyn kız karındaşları ve hâzırân vereseleri Dyano ve Panorya nâm Nasrâniyeler taraflarından husûs-ı âtîye vekîl olup hâlâ kazâ-i mezbûr kādısı tahrîr eylediği zeylinde olan şuhûd-ı tarîkden el-Hâc Cafer b. Abdullah ve İbrahim b. Hasan nâm kimesneler şehâdetleri ile şer‘an sâbit, yedinde olan nakd-i şer‘î zımnında vekâleti sâbite olan Dimitri v. İstemat nâm zimmî meclis-i şer‘de hâlik-i mezbûr bi’l-emâne muhallefâtına vâzı‘u’l-yed olan Todori v. Yani nâm zimmî muvâcehesinde bi’l-vekâle ikrâr ve takrîr-i kelâm edip müvekkilelerim mezbûretân Dyano ve Panorya hâlik-i mezbûr Nikola’nın li-ebeveyn karındaşları ve hasran vâriseleri mezbûretâna intikāl edip mezbûr Todori yedinde mevcûd olan sekiz bin nakd akçe ile bir gümüş maşrapa ve kadeh ve gümüş bıçak muhallefâtı bi’l-vekâle yedinden kabz edip muhallefâtından mezbûr Todori yedinde bir şey bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâlis aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Hüseyin Efendi el-Burûsî, Şükrullah [b.] Mustafa, Ali Bey b. Muharrem, Mustafa Kasab b. ( ), Veli b. Mahmud, Keşfî Mustafa Efendi el-kâtib, Yani v. Kostantin, Zako v. Nikola, Rilisar v. Dimo, Aleksi v. Nikola, Nikola v. Kostantin.