İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 472 Hüküm no: 527 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf b. Mehmed’in Mustafa Beşe b. Muharrem’e bahçe ve ev satışı Mülknâme. Vilâyet-i Anadolu’da Kastamonu sancağında Göl kazâsı tevâbi‘inden Yörükviran karyesi ahâlîsinden olup mahmiye-i İstanbul’da Edirnekapısı kurbünde müsâfiren sâkin Yusuf bin Mehmed nâm kimesne meclis-i şer‘de hâfızü’l-vesîka Mustafa Beşe b. Muharrem mahzarında ikrâr ve i‘tirâf edip karye-i mezbûrede cârî Sorkun suyu üzerinde dâyir bir göz mülk değirmen ve bir mülk çatma mülk anbârımı ve bir tarafı Ulu suya ve bir tarafı mülk bahçeme ve bir tarafı bostanlığıma ve bir tarafı tarîk-i âmma müntehî iki bâb tahtânî odalı ve samanlığı ve ahırı ve kenîfi müştemil mülk menzilimi ve bir tarafdan menzil-i mezbûra ve bir tarafdan Ulu suya ve bir tarafdan Mehmed ve Mustafa Bey menzillerine ve bir tarafdan tarîk-i âmma müntehî tahmînen iki dönüm mikdârı zât eşcâr-ı müsmire ve gayr-ı müsmire mülk bahçemi tevâbi‘ ve’l-levâhık ve safka-i vâhide ile iki yüz riyâlî guruşa mezbûr Mustafa Beşe’ye bey‘ ol dahi ber-minvâl-ı muharrer iştirâ ve kabûl ve semeni olan meblağ-ı mezbûr iki yüz riyâlî guruşu kızım, gāib ani’l-meclis Şeyhî Efendi b. Muharrem on sene mukaddem mezbûr Mustafa Beşe’den ikrâz ve kabz edip emr ve kabûlü hâviye kefâletle kefîl olduğum iki yüz riyâlî guruşa takās ol dahi mukāssa ve kabûl eyledikden sonra mahâllinde tesellüm ve kabza mezbûr Mustafa Beşe’yi taslît eyledim min-ba‘d mülk-i müşterâsı olup mutasarrıf olsun dedikde gıbbe’t-tasdîkı’l-mu‘teber mâ hüve’l-vâki‘ bi’t-taleb ketb olundu. Fi’l-hâmis aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Muhzır el-müderris Abdülbaki Efendi, Şeyhzar Mehmed Efendi b. eş-Şeyh Sinan Efendi, es-Seyyid Mehmed Efendi el-müderris, Hüseyin Efendi el-Burûsî, Seyyid Mustafa Bey b. Mehmed, Seyyid Pîrî Çelebi b. Kâmil, Ahmed b. Reyhan, Abdi Çelebi b. Hüseyin.