İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 473 Hüküm no: 528 Orijinal metin no: [65a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Beşe’nin varisleri kardeşinin çocukları Ahmed ve Ali olup muhallefatının Mehmed Beşe’den alınıp bunlara verildiği İsbât-ı verâset. Vilâyet-i Rumeli’nde İlbasan kasabası sükkânından müteveffâ Sinan nâm kimesnenin sulbî sagīr oğulları Ahmed ve Ali’nin vasîyy-i şer‘îleri olmağla sagīrân-ı mezbûrânın ammileri olup vilâyet-i Anadolu’da Mihaliç kazâsına tâbi‘ Yörgüç nâm karyede mutavattın iken vefât eden birinci ağa bölüğüne mahsûs oda ahâlîsinden Hüseyin Beşe nâm râcilin verâsetini sagīrân-ı mezbûrâna münhasır olduğu bi’l-vesâye iddi‘â eden Hızır b. Kaya nâm kimesne meclis-i şer‘-i hatîrde oda-i mezbûr ahâlîsinden olup müteveffâ-i mezbûr Hüseyin Beşe’nin metrûkâtına vâzı‘u’l-yed idiği şer‘an sâbit olan Mehmed Beşe b. Ali nâm râcil mahzarında üzerine bi’l-vesâye da‘vâ edip vasîleri olduğum sagīrân-ı mezbûrân Ahmed ve Ali müteveffâ-i mezbûr Hüseyin Beşe’nin li-ebeveyn karındaşı mezbûr Sinan’ın sulbî oğulları olup cümle muhallefâtı mezbû[r]âna â’id iken mezbûr Mehmed Beşe cümle metrûkâtını bi-gayr-ı hakkın kabz eylemişdir suâl olunup makbûzu olan terekeyi alıverilmek bi’l-vesâye murâdımdır dedikde gıbbe’s-suâl mezbûr Mehmed Beşe cevâbında tereke-i müteveffâ-i mezbûra vaz‘-ı yed eylediğini ikrâr lâkin sagīrân-ı mezbûrânın vech-i muharrer üzere verâsetlerini ve müdde‘î-i mezbûrun vesâyetini inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-ı ricâl-i Müslimînden olup zikrolunan İlbasan kasabası sükkânından Mehmed b. Süleyman ve Mustafa b. Mehmed nâm kimesneler li-ecli’ş-şehâde meclis-i şer‘de hâzırân olup istişhâd olunduklarında fi’l-vâki‘ sagīrân-ı mezbûrân Ahmed ve Ali müteveffâ-i mezbûr Hüseyin Beşe’nin li-ebeveyn karındaşı mezbûr Sinan’ın oğullarıdır zîrâ mezbûr müteveffâ-i mezbûr Hüseyin ile mezbûr Sinan’ın babaları ismi Ali ve cedleri ismi Keyka nâm zimmîdir ve maskat-ı re’sleri kasaba-i mezbûre İlbasan’dır. Müdde‘î-i mezbûr Hızır dahi sagīrân-ı mezbûrânın vasîyy-i şer‘îleridir mezbûrândan gayrı vâris ve terekesine müstahıkk-ı âhar olduğu ma‘lûmumuz değildir eyne mâ kânet ve hasbemâ vahded mezbûr Hüseyin Beşe’nin terekesi sagīrân-ı mezbûrâna âiddir biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iye ile eylediklerinde gıbbe ri‘âyet-i şerâ’iti’l-kabûl şehâdetleri makbûl olmağın mûcebince ba‘de’l-hükm <> vasîyy-i mezbûr meclis-i şer‘de mezbûr Mehmed Beşe muvâcehesinde bi’l-vesâye ikrâr edip müteveffâ-i mezbûr Hüseyin Beşe’nin terekesinden mezbûr Mehmed Beşe’nin makbûzu olan on üç bin yedi yüz altmış altı akçeyi bi’t-tamam ve’l-kemâl vesâyetim hasebiyle mezbûr Mehmed Beşe yedinden alıp kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâlis aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: el-Hâc Ahmed b. Mahmud, Veli b. Mahmud, Du‘âcı Ahmed Çelebi, Mustafa b. İsa, Hasan b. Mustafa, Osman b. Abdullah, Mustafa b. Ahmed, Mustafa b. Mehmed, Abdülkerim b. Mehmed.