İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 474 Hüküm no: 529 Orijinal metin no: [65a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Himmet ile İbrahim Ağa b. Ahmed arasındaki tarla davasının anlaşmayla bitirildiği İbrâ ve ıskāt. Vilâyet-i Anadolu’da Bolu sancağında Onikidîvân kazâsına tâbi‘ Botnaz? nâm karye sâkinlerinden Ahmed b. Himmet nâm kimesne meclis-i şer‘-i hatîr-i lâzımü’t-tevkīrde yine karye-i mezbûre sâkinlerinden İbrahim Ağa b. <> eş-Şeyh Ahmed mahzarında ikrâr ve takrîr-i kelâm edip karye-i mezbûre sınırı dâhilinde vâki‘ lede’l-ahâlî ma‘lûmü’l-hudûd Orucgölü demekle ma‘rûf tarlanın nısfının hakk-ı tasarrufu mezbûr İbrahim Ağa’nın ve nısf-ı âharı dahi bundan akdem vefât eden ammim Musa nâm kimesnenin tasarrufunda olup ammim-i mezbûr bilâ-veled vefât etmekle tasarrufunda olan nısf-ı âharının hakk-ı tapusu benimdir deyü mezbûr İbrahim Ağa’dan da‘vâ ve taleb eylediğimde beynimizde münâza‘ât-ı kesîre vâki‘ olmuşdu. El-hâletü-hâzihî beynimize muslihûn tavassut edip zikrolan tarla da‘vâsından fâriğ oldum olduk dedikde gıbbe’t-tasdîk mezbûr İbrahim Ağa meclis-i mezbûrda merkūm Ahmed mahzarında ikrâr ve i‘tirâf edip karye-i mezbûrede vâki‘ Karaağaç tarlası demekle ma‘rûf tarlanın hakk-ı tasarrufunu izn-i sahib-i arz ile mezbûr Ahmed’e meccânen ferâğ ve tefvîz edip ol dahi tefevvüz ve kabûl eyledikden gayrı deyn-i şer‘îden zimmetinde hakkım olan üç yüz otuz akçe da‘vâsından mezbûr Ahmed’in zimmetini ibrâ ve ıskāt eyledim dedikde gıbbe’t-tasdîk mâ-vaka‘a ketb olundu. Tahrîren fi’l-yevmi’s-sânî aşer min-Şevvali’l-mükerrem li-sene [10]72. Şuhûdü’l-hâl: Hüseyin Efendi b. Hamid Efendi, diğer Hüseyin Efendi b. Ebulleys, Yusuf b. Şaban Mustafa b. Abdülkerim, Ahmed Efendi b. el-Hâc Şaban Bey ve gayruhum.