İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 475 Hüküm no: 530 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Şaban’ın İbrahim Bey b. Ahmed ile olan davasına delil getiremediği Yemîn. Vilâyet-i Anadolu’da Bolu sancağında Onikidîvân kazâsına tâbi‘ Botnazgerişi? nâm karye sâkinlerinden iken bundan akdem vefât eden Ramazan b. Mehmed nâm kimesnenin verâsetini vâlidesi Hadîce bt. Abdullah nâm hatun ile li-ebeveyn karındaşı oğlu Mustafa b. Şaban’a münhasıra ve tashîh-i meselesi üç sehimden olup sihâm-ı mezbûreden bir sehmi mezbûre Hadice’ye ve iki sehmi mezbûr Mustafa’ya münhasıra olduğu şer‘an zâhir ve mütebeyyin oldukdan sonra mezbûr Mustafa meclis-i şer‘de yine karye-i mezbûrede sâkin işbu râfi‘u’l-kitâb İbrahim Bey [b.] eş-Şeyh Ahmed nâm kimesne mahzarında üzerine da‘vâ ve takrîr-i kelâm edip müteveffâ-i mezbûr Ramazan’ın muhallefâtından üç bin akçe kıymetli bir çift kara sığır öküzleri fuzûlen zabt ve tasarruf etmişdir suâl olunup aynıları mevcûd ise aynıları değil ise ba‘de’l-ityân zimmet-i şer‘iyesi olan iki bin akçe hissemi taleb ederim suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına mübeyyine beyyine taleb olundukda ikāmet-i beyyineden ızhâr-ı acz edip istihlâf etmeğin mezbûr İbrahim Bey’e müteveffâ-i mezbûr Ramazan’ın muhallefâtından bundan akdem üç bin akçe kıymetli iki kara sığır öküzlerin ahz u kabz etmediğine yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin müdde‘î-i mezbûr Mustafa bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sânî aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: es-Sâbıkūn.