İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 475 Hüküm no: 531 Orijinal metin no: [65b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Muslu’nun terekesinden dolayı Muharrem ve Abdülbaki b. Nizami’nin vasîsi olan Hüseyin b. Abdullah’ın varislerin haklarını teslim ettiği Nakl-i vürûd. Hâlâ Yedidîvân kādısı olan Salih Efendi b. Nezir kıbelinden imzâsıyla mümzâ ve hatmi ile mahtûm ve târih-i kitâb senesi Ramazan-ı mübârekenin yirmi birinci günü târihi ile müverrah kitâb-ı nakli vârid olup mazmûnu kazâ-i mezbûra tâbi‘ Dağ nâm karye sükkânından Muharrem ve Abdülbaki b. Nizâmî nâm kimesnelerden vech-i âtî üzere da‘vâ-i sahîha-i şer‘iye ile mesbûk iştihâd-ı şer‘î sudûrundan sonra udûl-ı Müslimînden olup karye-i mezbûre sükkânından Abdüsselam b. Abdullah b. Abdullah ve Kara Mehmed b. Kalender b. Mustafa nâm kimesneler nakl ve tahvîl için mahâll-i cerh ve ta‘dîle hâzırân olup mahmiye-i İstanbul’da ( ) mahallesinde sâkine iken bundan akdem fevt olup terekesi vasîyy-i muhtârı Hüseyin b. Abdullah yedinde mazbûta olan Âişe bt. Muslu’nun müsteşhidân-ı mezbûrân Muharrem ve Abdülbaki li-ebeveyn ammi oğulları ve usûbet-i nesebiye cihetinden vârisleridir zîrâ mezbûrânın babaları Nizâmî mezbûre Âişe’nin babası ve Muslu’nun babası Alihan’ın babası Mahmud Sofu ile li-ebeveyn karındaşlardır. Babaları Hayreddin nâm kimesne ve cedleri Veli’dir ve maskat-ı re’sleri karye-i mezbûredir müteveffâ-i mezbûrenin verâseti mezbûrân ile zevc-i metrûkü Pir Mehmed Bey b. Veli’ye münhasıradır. Bunlardan gayrı vârisi ve terekesine âhar müstahık olduğu ma‘lûmumuz değildir biz bu husûsa şâhidleriz şehâdet dahi ederiz deyü her biri edâ-yı şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle oldukdan sonra mezbûr Abdülbaki müteveffât-i mezbûreden kendine isâbet eden dört sehimden bir sehm hissesini vâzı‘u’l-yed olanlardan da‘vâ ve taleb ve ahz u kabza ve kendine îsâle ve kabz ve îsâl mütevakkıf olduğu umûrun cümlesine tarafından nâkil-i kitâb Ahmed Efendi b. İsa’yı vekîl nasb ü ta‘yîn eyledikde ol dahi kabûl ve hizmet-i lâzımesini edâya ta‘ahhüd eylediğini hâvî olmağın kitâb-ı mezbûr vekîl-i merkūm Ahmed Efendi ile mezkûr Muharrem talebi ile tereke-i müteveffâ-i mezbûra vâzı‘u’l-yed olan vasîyy-i merkūm Hüseyin muvâcehesinde feth ü kırâet ve istintâk olundukda tereke-i müteveffâ-i mezbûra vaz‘-ı yedini ikrâr kitâb-ı ma‘hûdun mevlânâ-yı mezbûr kıbelinden vürûdunu inkâr edicek zeyl-i kitâbda isimleri mastûr olan şuhûd-ı tarîkden Halil b. Receb ve İbrahim b. İlyas ve Süleyman b. Bayram nâm kimesneler li-ecli’ş-şehâde meclis-i şer‘de hâzırûn olup isre’l-istişhâd fi’l-vâki‘ işbu kitâb-ı mevlânâ-yı mezbûr Salih Efendi b. Nezir kıbelinden vürûd olup zeylinde olan hat ve zahrında olan hâtem mevlânâ-yı mezbûrundur bizim huzûrumuzda imzâlayıp ve hâtem vurup hat ve hatmine bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle oldukdan sonra mezbûrân Muharrem ve Abdülbaki’ye tereke-i müteveffât-i mezbûreden isâbet eden dört sehimden bir sehm hisselerini teslîme vasîyy-i mezbûra tenbîh olundukdan sonra mezbûrân ve Muharrem meclis-i mezbûrda vasîyy-i merkūm Hüseyin muvâcehesinde her biri asâleten ve vekâleten ikrâr ve i‘tirâf edip tereke-i müteveffât-i mezbûreden bize intikāl edip vasîyy-i mezbûrun makbûzu olan yedi bin seksen dört akçeyi asâleten ve vekâleten vasîyy-i mezbûr yedinden bi’t-tamam ahz u kabz edip müteveffât-i mezbûrenin terekesinden vasîyy-i mezbûrun yedinde bir akçe ve bir habbe bâkī kalmadı ba‘de’l-yevm müteveffât-i mezbûrenin terekesinden kalîl ve kesîr ve celîl ve hakîr terekesine müte‘allika vasîyy-i mezbûr ile zevc-i mezkûr Pir Mehmed Bey ile vechen mine’l-vücûh ve sebeben mine’l-esbâb da‘vâ ve nizâ‘ım ve alâka ve medhalim kalmadı dediklerinde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’l-a‘şir min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Hüseyin Çelebi el-müezzin, Murtaza Çelebi el-kayyum, Mehmed Beşe b. ( ), Hasan Bey b. ( ) Seyyid Ahmed Efendi b. ( ), Satılmış b. Durmuş, Abdi b. Hüseyin, Mehmed b. Ramazan.