İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 484 Hüküm no: 549 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maktul Mimarbaşı Mustafa Ağa’nın mîrî için el konulan evinin zevcesi Saraylı Mâhimünir Hatun bt. Abdullah’ın mîrîdeki hissesine karşılık takas edildiği Mâhmünîr Hatun’un mülknâmesidir. Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Mustafa Efendi b. Ahmed irsâl olunup ol dahi Atebe-i aliyyede şıkk-ı evvel defterdârı olan el-cenâbü’l-âlî makarru’l-mefâhirü ve’l-meâli sahibü’l-câhü’l-menî‘ sahibü ezyâli’l-mecdi’r-refî‘ âkidü me‘âkidi’d-devletü’ş-şâmiha kā‘idü mekâ‘idi’l-izzeti’r-râsiha el-mahfûfu bi-inâyeti’l-meliki’l-ganî a‘ni-bih Ahmed Efendi edâmallâhu ve ıkbâlehu hazretlerinin mahmiye-i İstanbul’da Vefa meydânı kurbünde vâki‘ menzil-i âlîlerine varıp zeyl-i rakīmde esâmîleri mastûr Müslimîn-i huzûrunda akd-i meclis-i şer‘-i kadîm eyledikde mahmiye-i mezbûrede Ayasofya-i kebîr kurbünde Hayreddin [-Bey] mahallesi sükkânından iken magzûben katl olunan Mi‘mârbaşı Mustafa Ağa’nın zevce-i metrûkesi işbu râfi‘atü’l-kitâb Saraylı Mâhimünîr Hatun bt. Abdullah tarafından husûs-ı câ’i’z-zikre vekîl olup zât-ı mezbûreyi ma‘rifet-i şer‘iye ile ârifân olup yine mahalle-i mezbûre sükkânından Mehmed Efendi b. Ahmed ve Mustafa b. Abdullah şehâdetleri ile şer‘an vekâleti sâbite olan el-Hâc Fazlullah b. Mustafa muvâcehesinde müşârün-ileyh efendi hazretleri ikrâr ve takrîr-i kelâm edip bundan akdem maktûl-i mezbûrun akār ve menkūl cümle terekesi fermân-ı âlî mûcebince taraf-ı mîrî için zabtolunmağla mahalle-i mezbûrda vâki‘ bir tarafdan Ahmed Çelebi mülküne ve bir tarafdan yine maktûl-i mezbûrun Haremeynü’ş-şerîfeyn Vakfı’ndan tasarrufunda olan menzile ve bir tarafdan Derviş Çavuş mülklerine ve bir tarafdan tarîk-i âmma müntehî olup üç bâb harâba müşrif fevkānî odaları ve kapı üzerinde bir bâb fevkānî odayı ve iki bâb tahtânî oda ve bir matbah ve bir harâbe mahzen ve bir hamam ve ahırı ve bir su kuyusunu ve havluyu müştemil olan mülk menzil bundan esbak taraf-ı mîrîden bey‘ olunmak için sûk-ı sultanîde beyne’t-tâlibîn ve’r-râgıbîn nidâ ve müzâyede olup ragabât-ı nâs bi’l-külliye münkatı‘a oldukda müvekkile-i müşârün-ileyhâ üzerinde semen-i mislî olan bin beş yüz kıt‘a kâmilü’l-ayâr riyâlî guruşda karâr edip ziyâde bir akçe ile âhar tâlib zuhûr etmemeğin menzil-i mahdûd-ı mezbûru bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık bin beş yüz kâmilü’l-ayâr riyâlî guruşa müvekkile-i mezbûre Saraylı Hatun’a cânib-i mîrîden bey‘-ı bâtt-ı sahîh-i şer‘î ile bey‘ ve teslîm ol dahi minvâl-ı muharrer üzere iştirâ ve tesellüm ve kabûl eyledikden sonra semen-i mezkûr bin beş yüz riyâlî guruşu müvekkile-i mezbûrenin yedinde olan hüccet-i şer‘iye mûcebince taraf-ı mîrîye olan bin beş yüz kâmilü’l-ayâr riyâlî guruş hissesine takās ol dahi mukāssa ve kabûl eyledi. Ba‘de’l-yevm menzil-i mahdûd-ı mezbûr merkūm Saraylı Mâhmünîr Hatun’un mülkü müşterâsıdır. Keyfe mâ yeşâ’ ve yehtâr mutasarrıfe olsun dedikde mukırr-ı mezbûr Ahmed Efendi hazretlerinin cemî‘ kelimâtını vekîl-i mezbûr el-Hâc Fazlullah bi’l-muvâcehe tasdîk ve bi’l-müşâfehe tahkīk eylediğin mevlânâ-yı mezbûr mahâllinde tahrîr ba‘dehû gelip meclis-i şer‘de inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min-Şevvali’l-mükerrem li-sene 1072. Şuhûdü’l-hâl: Umdetü’l-emâcid ve’l-ekârim Cebecibaşı Ali Ağa, Mehmed Efendi b. Ahmed, Abdülkadir Ağa b. Ali el-cündî, Süleyman Efendi b. ( ) el-imâm, Mehmed Halîfe el-müezzin, Hanefî Çelebi b. Ali, Abdurrahman b. Mirza, Osman Çavuş b. ( ), Hacı Yusuf b. Abdullah, Osman b. Ali, Mustafa b. Abdülmuttalib, Bâki Ahmed Ağa.